جاڭا وقۋ جىلى قارساڭىندا الماتى بيلىگى جول جاعدايىنا، قوعامدىق كولىك جۇمىسىنا جانە مەكتەپ ماڭىنداعى قاۋىپسىزدىككە باقىلاۋدى كۇشەيتپەك، دەپ حابارلايدى infohub.kz سايتى.
الماتى اكىمى دارحان ساتىبالدى قالانىڭ وقۋ جىلىنا دايىندىعىنا ارنالعان كەڭەيتىلگەن اپپاراتتىق كەڭەس وتكىزدى. نەگىزگى نازار كولىك جاعدايىنا، بالالار قاۋىپسىزدىگىنە جانە جول قۇرىلىسى جۇمىستارىنىڭ بارىسىنا اۋدارىلدى.
قالا باسشىسى جاۋاپتى قىزمەتتەرگە كۇشەيتىلگەن جۇمىس رەجيمىنە كوشۋدى تاپسىردى. قىركۇيەكتىڭ العاشقى كۇندەرىندە قوعامدىق كولىكتىڭ تۇراقتى جۇمىسىن قامتاماسىز ەتۋ، كەپتەلىستەرگە جەدەل دەن قويۋ جانە جولداردىڭ نەگىزسىز جابىلۋىنا جول بەرمەۋ قاجەت.
مەكتەپ ماڭىنداعى ۋچاسكەلەرگە ەرەكشە نازار اۋدارىلادى. ساتىبالدى جول جاعدايىن باقىلاۋدى كۇشەيتىپ، ەڭ كوپ جۇكتەلگەن ۋچاسكەلەردە قوسىمشا شارالار قابىلداۋدى تاپسىردى.
ءتيىستى باسقارمالار، اۋداندىق اكىمدىكتەر جانە پوليسيا دەپارتامەنتى جولدارداعى احۋالدى ۇنەمى باقىلاپ، قالاداعى جاعدايدى ەسكەرە وتىرىپ، جەدەل شەشىمدەر قابىلداۋى ءتيىس.
بۇعان دەيىن الماتىدا وقۋ جىلىنىڭ باسىندا قوعامدىق كولىك جۇمىسى كۇشەيتىلەتىنى حابارلانعان بولاتىن. قىركۇيەكتىڭ العاشقى ەكى اپتاسىندا قوسىمشا 500-گە جۋىق اۆتوبۋس مارشرۋتقا شىعادى، ال مەترو پويىزدارىنىڭ سانى 11-دەن 13-كە دەيىن ارتادى. مەكتەپ وقۋشىلارىن تاسىمالداۋعا 300 اۆتوبۋس جۇمىلدىرىلادى، ولار 60 مەكتەپكە جانە 13 مىڭنان استام بالاعا قىزمەت كورسەتەدى. 1-5 قىركۇيەك ارالىعىندا اكىمدىك قىزمەتكەرلەرىنىڭ ءبىر بولىگى قاشىقتان جۇمىس ىستەۋگە كوشەدى، ءىرى كومپانيالارعا دا قاشىقتان جۇمىس نەمەسە يكەمدى جۇمىس كەستەسىن قاراستىرۋ ۇسىنىلدى.
سونىمەن قاتار، الماتى پوليسياسى قالا تۇرعىندارىن 1 قىركۇيەكتە جەكە كولىكتەرىنەن مۇمكىندىگىنشە باس تارتۋدى سۇراعان بولاتىن. وقۋ جىلىنىڭ العاشقى كۇندەرىندە ءتارتىپتى قامتاماسىز ەتۋگە 700-گە جۋىق پوليسەي جانە 130-دان استام پاترۋلدىك ەكيپاج جۇمىلدىرىلادى، ال مەكتەپ ماڭىندا ستاسيونارلىق بەكەتتەر مەن ءموبيلدى پاترۋلدەر جۇمىس ىستەيتىن بولادى.
2026-2027 وقۋ جىلىندا قازاقستاندا 8 048 مەكتەپ جۇمىس ىستەيدى، ال وقۋشىلار سانى 4،1 ميلليوننان اسادى، ونىڭ ىشىندە 380 مىڭنان استام ءبىرىنشى سىنىپ وقۋشىسى بار. قاڭتار-شىلدە ايلارىندا ەلىمىزدە 18 090 ورىندىق 32 جاڭا مەكتەپ پايدالانۋعا بەرىلدى.