اباي كۇنى قارساڭىندا الماتىدا ۇلى اقىن ءارى اعارتۋشىنىڭ مۇراسىنا ارنالعان مادەني كەش ءوتتى. مىڭداعان كورەرمەن اشىق اسپان استىندا اباي قۇنانباەۆتىڭ شىعارماشىلىعىنا ءۇڭىلۋ ءۇشىن جينالدى، دەپ حابارلايدى infohub.kz.
اشىق اسپان استىنداعى ساحنادا كورەرمەندەرگە «العاشقى كىتاپ» دەرەكتى ءفيلمى كورسەتىلدى، ودان كەيىن مۋزىكالىق-پوەتيكالىق جانە كونسەرتتىك باعدارلاما باستالدى.
قازاقستان رەسپۋبليكاسى مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن دەرەكتى فيلم اباي شىعارمالارىنىڭ العاشقى جيناعىنىڭ جارىققا شىعۋ تاريحىن باياندايدى. دوكۋدراما جانرىنداعى تۋىندى اقىننىڭ 1909 جىلى سانكت-پەتەربۋرگتە ءىلياس بوراعانسكي باسپاسىندا جارىق كورگەن تۇڭعىش كىتابىنىڭ تاعدىرىن اڭگىمەلەيدى.
فيلم اۆتورلارى اباي شىعارمالارىنىڭ قالاي جينالىپ، باسپاعا دايىندالعانىن، كىتاپتىڭ شىعۋىنا كىمدەر قاتىسقانىن، ونىڭ ءدال سانكت-پەتەربۋرگتە جارىق كورۋىنىڭ سەبەبىن جانە باسىلىم جولىندا قانداي قيىندىقتار بولعانىن باياندايدى.
كورسەتىلىمنەن كەيىن الماتى قالالىق مادەنيەت باسقارماسى ۇيىمداستىرعان مۋزىكالىق-پوەتيكالىق باعدارلاما ءوتتى. قويىلىمعا تالعات كۇزەمبايەۆ، ليديا كادەنوۆا، ەرلان ءبىلال، دارحان سۇلەيمەنوۆ، اسان ءماجيت، دينارا كەمەلحان، ەردەن جاقسىبەك، «الاش ۇلى» توبى جانە حور كاپەللاسى قاتىستى.
كەش Almaty Summer Fest فەستيۆالىمەن جالعاستى. ساحنادا ماقپال ءجۇنىسوۆا، جانار دۋعالوۆا، اسحات تارعىن، نۇرلان بەردىبايەۆ، سەرىك يساقان، Ayarai، Birzhan Demeuuly، Nurtore، Magsoul، KeshYou، 6ellucci توپتارى، IL Canto كۆارتەتى جانە باسقا دا ارتىستەر ابايدىڭ اندەرى مەن ولەڭدەرىن ورىندادى.
كەش اشىق اسپان استىندا اباي اندەرىن بىرلەسىپ ورىنداۋمەن اياقتالدى — ارتىستەرگە مىڭنان استام كورەرمەن قوسىلدى.