الماتىدا سيرەك كەزدەسەتىن وقيعا بولدى: ءبىر كولىك ءبىر كۇندە ەكى رەت ارنايى ايىپپۇل تۇراعىنا قويىلىپ، ونىڭ يەسىنە قاتىستى قىلمىستىق ءىس قوزعالدى، دەپ حابارلايدى infohub.kz سايتى.
الماتى قالالىق پوليسيا دەپارتامەنتىنىڭ مالىمەتىنشە، كولىك كوپتەگەن تولەنبەگەن ايىپپۇلعا بايلانىستى ارنايى تۇراققا قويىلعان.
«بىرنەشە ساعاتتان كەيىن يەسى قۇجاتتارىن الۋعا كەلگەن. ءبىراق ونىڭ ورنىنا رولگە وتىرىپ، تۇراق اۋماعىنان ءوز بەتىنشە شىعىپ كەتتى. پوليسيا كولىكتى ىزدەۋگە كىرىستى. كولىك قۇدەرين كوشەسىنىڭ ماڭىنداعى رايىمبەك داڭعىلىندا تابىلىپ، بۇعاتتالدى. سودان كەيىن ول قايتادان ارنايى ايىپپۇل تۇراعىنا جەتكىزىلدى»، — دەپ ءتۇسىندىردى پوليسياداعىلار.
وسىدان كەيىن جۇرگىزۋشىگە قاتىستى ءۇش اكىمشىلىك حاتتاما تولتىرىلدى. سونىمەن قاتار ءوز بەتىنشە شىعىپ كەتۋ فاكتىسى بويىنشا قىلمىستىق ءىس قوزعالدى. ەر ادام جەتىسۋ اۋدانىنىڭ پوليسيا باسقارماسىنا جەتكىزىلدى.
پوليسيا ەسكە سالادى: كولىكتىڭ ارنايى تۇراقتا تۇرۋى — جاي فورمالدىلىق ەمەس. ونىڭ اۋماعىنان ءوز بەتىنشە شىعۋ قۇقىقتىق سالدارعا اكەپ سوعادى.