الماتى حالىقارالىق كونسالتينگتىك كومپانيا Boston Consulting Group (BCG) ازىرلەگەن «اقىلدى قالالار يندەكسى 2026» (Intelligent Cities Index 2026) اتتى العاشقى الەمدىك رەيتينگكە قاتىستى، دەپ حابارلايدى infohub.kz.
زەرتتەۋ قالالاردىڭ تۇرمىس ساپاسىن جاقسارتۋ، ەكونوميكانى ىنتالاندىرۋ جانە قالالىق باسقارۋدى وڭتايلاندىرۋ ءۇشىن جاساندى ينتەللەكت پەن سيفرلىق تەحنولوگيالاردى قالاي قولداناتىنىن باعالايدى. ساراپشىلار تەك سيفرلاندىرۋ دەڭگەيىن عانا ەمەس، تەحنولوگيالاردىڭ تۇرعىندارعا تيگىزەتىن پراكتيكالىق پايداسىن دا ەسكەردى.
قازاقستاندىق مەگاپوليس الەمنىڭ 61 ءىرى قالاسى اراسىندا 62 ۇپاي جيناپ، 38-ورىنعا يە بولدى. وسىلايشا الماتى ستامبۋل (52-ورىن، 55 ۇپاي)، دەلي (43-ورىن، 59 ۇپاي)، ميلان (41-ورىن، 61 ۇپاي)، ۆارشاۆا (47-ورىن، 58 ۇپاي) جانە مەحيكو (53-ورىن، 55 ۇپاي) سەكىلدى ءىرى قالالاردى ارتتا قالدىردى. رەيتينگتە الماتى توكيو، گونكونگ جانە دجاكارتامەن قاتار ورنالاستى.
رەيتينگتى قۇراستىرۋ بارىسىندا BCG ماماندارى تۇرعىندارعا ارنالعان ناتيجەلەر، دامۋ ستراتەگياسى، سيفرلىق قىزمەتتەر مەن جاساندى ينتەللەكتتى ەنگىزۋ، باسقارۋ تيىمدىلىگى، سونداي-اق ينفراقۇرىلىم، قارجىلاندىرۋ جانە كادرلىق الەۋەت سياقتى بەس باعىتتى تالدادى. زەرتتەۋ قورىتىندىسى بويىنشا الماتى «دامۋشى قالالار» ساناتىنا جات قىزىلدى – ياعني سيفرلىق ورتانى جەتىلدىرۋدى جانە زاماناۋي تەحنولوگيالاردى قولدانۋدى كەڭەيتۋدى جالعاستىرىپ جاتقان قالالار.
Intelligent Cities Index 2026 كوشباسشىسى – لوندون. ودان كەيىن دۋباي، نيۋ-يورك، ۆاشينگتون جانە امستەردام تۇر. BCG-نىڭ پىكىرىنشە، بۇل قالالار قالالىق ورتانى دامىتۋ ءۇشىن جاساندى ينتەللەكت پەن سيفرلىق تەحنولوگيالاردى بارىنشا ءساتتى قولدانادى. اۆتورلار اتاپ وتكەندەي، ناعىز «اقىلدى» قالا – تەحنولوگيالار كوپ ەنگىزىلگەن قالا ەمەس، سيفرلىق شەشىمدەر تۇرعىندارعا شىنىمەن كومەكتەسەتىن، قىزمەتتەردى ىڭعايلى ەتەتىن جانە ەكونوميكالىق وسۋگە ىقپال ەتەتىن قالا.
بۇعان دەيىن «كۋرسيۆ» باسىلىمى الماتىنىڭ QS Best Student Cities 2027 الەمدىك رەيتينگىندە ورتالىق ازياداعى ۇزدىك ستۋدەنتتىك قالا دەپ تانىلعانىن حابارلاعان بولاتىن.