قازاقستان رەسپۋبليكاسىنىڭ جاساندى ينتەللەكت جانە سيفرلىق دامۋ ۆيسە-مينيسترى عيززات بايتۇرسىنوۆ ۇكىمەتتەگى بريفينگتە جاساندى ينتەللەكتىنى قولدانۋ تاۋەكەلدەرى تۋرالى ايتىپ، الماتى اكىمدىگىنىڭ قىزمەتكەرىنىڭ جي كومەگىمەن فوتوسۋرەتتەگى قوقىستى وشىرگەن ارەكەتىنە تۇسىنىكتەمە بەردى، دەپ حابارلايدى infohub.kz سايتى.
ۆيسە-مينيستردىڭ ايتۋىنشا، جاساندى ينتەللەكت ادامداردى ەشقاشان الماستىرمايدى جانە ءارقاشان كومەكشى-اسسيستەنت رولىندە بولادى.
«شارتتى تۇردە ايتساق، ءسىز جي ارقىلى قانداي دا ءبىر جۇمىستى جىلدامداتا الاسىز، كەيبىر بيزنەس-پروسەستەردى اۆتوماتتاندىرا الاسىز. ەگەر اقپارات اعىنى كوپ بولسا، ءجي-دى سۇزگى رەتىندە پايدالانۋعا بولادى. ءبىراق كەز كەلگەن جاعدايدا سوڭعى شەشىمدى ادام قابىلدايدى، ءبىزدىڭ ۇستانىمىمىز وسىنداي. اكىمدىك قىزمەتكەرىنە كەلەتىن بولساق: مۇندا ءجي-دىڭ كىناسى جوق، مۇندا جي قۇرال رەتىندە ارەكەت ەتەدى. بۇل جۇمىستى نەگە ورىنداماعانىن سول ادامنان سۇراۋ كەرەك. ال جي مۇندا تازا قۇرال، ونى جاقسى ماقساتتا دا، وسىنداي ماقساتتا دا پايدالانۋعا بولادى. مەنىڭ قوسارىم وسى»، — دەدى بايتۇرسىنوۆ.
ەسكە سالايىق، ماۋسىم ايىندا الماتىنىڭ بوستاندىق اۋدانى اكىمدىگىندە جي كومەگىمەن فوتوسۋرەتتەگى قوقىستى ءوشىرىپ، فوتونى تازالاۋ جۇمىسىنىڭ ناقتى ناتيجەسى رەتىندە ۇسىنعان شەنەۋنىك جۇمىستان شىعارىلعان بولاتىن.