16-20 شىلدە ارالىعىندا الماتىدا قاتتى ىستىق كۇتىلەدى. كەي جەرلەردە اۋا تەمپەراتۋراسى +42°C-قا دەيىن كوتەرىلەدى. بۇل بيىلعى جازدىڭ ەڭ ىستىق كەزەڭى بولماق. سوندىقتان قالالىق قىزمەتتەر كوشەلەردى جيىرەك جانە كوبىرەك سۋارۋدى باستايدى، دەپ حابارلايدى infohub.kz سايتى.
الماتى اكىمدىگىنىڭ مالىمەتىنشە، ەڭ ىستىق ساعاتتاردا قالا جولدارىنا 16 ارنايى تەحنيكا كولونناسى شىعادى. ولار جولدىڭ ءجۇرۋ بولىگىن سۋارىپ قانا قويماي، اۋاعا دا سۋ بۇركىلەتىن بولادى. جۇمىستار قارقىندى كولىك جانە جاياۋ جۇرگىنشى قوزعالىسى بار 128-دەن استام كوشەنى قامتيدى.
سونىمەن قاتار، قالادا كۇندەلىكتى سانيتارلىق تازالاۋ جۇمىستارى جالعاسۋدا. 500-دەن استام ارنايى تەحنيكا جولداردى، تروتۋارلاردى، ايالدامالاردى جانە باسقا دا قالا ينفراقۇرىلىمى نىساندارىن جۋىپ-تازالايدى.
جولداردى سۋارۋ جانە اۋانى ىلعالداندىرۋ جول بەتىندەگى تەمپەراتۋرانى تومەندەتۋگە، شاڭدى ازايتۋعا جانە اسفالتتى قىزىپ كەتۋدەن قورعاۋعا كومەكتەسەدى.
بۇعان دەيىن انومالدى ىستىققا بايلانىستى الماتىلىقتار جەدەل جاردەمدى ءجيى شاقىرا باستاعانى حابارلانعان بولاتىن.