قازاقستاننىڭ ەكى مەگاپوليسى الەمنىڭ ۇزدىك 300 قالاسىنىڭ قاتارىنا قايتا ەندى، الايدا ءبىر جىل ىشىندە جاھاندىق رەيتينگتەگى ورنىن ناشارلاتتى. Oxford Economics كومپانياسى دايىنداعان Global Cities Index 2026 تىزىمىندە الماتى 265-ورىنعا، ال استانا 281-ورىنعا جايعاستى، دەپ حابارلايدى infohub.kz سايتى.
ءبىر جىل بۇرىن، 2025 جىلعى رەيتينگتە الماتى 258-ساتىدا، استانا 276-ساتىدا تۇرعان. وسىلايشا، وتكەن جىلى وڭتۇستىك استانا جەتى ساتىعا، سولتۇستىك استانا بەس ساتىعا تومەندەدى. سوعان قاراماستان، ەكى قالا دا ورتالىق ازيا قالالارى اراسىنداعى كوشباسشىلىق مارتەبەسىن ساقتاپ قالدى.
قازاقستاندىق مەگاپوليستەر ەڭ ۇزدىك ناتيجەسىن ادامي كاپيتال دەڭگەيى بويىنشا كورسەتتى. بۇل كورسەتكىش بويىنشا الماتى 66-ورىنعا، استانا 98-ورىنعا تۇراقتادى. ەكى قالا دا انكارا، ۆارشاۆا، پراگا، تاللين جانە ماسكەۋدى باسىپ وزدى.
ايتا كەتەيىك، ءبىر جىل بۇرىن الماتى ادامي كاپيتال بويىنشا 64-ورىندا ەدى. بۇل ساناتتا قالانىڭ كادرلىق الەۋەتىنىڭ ساپاسى مەن اۋقىمى، ءبىلىم دەڭگەيى، كاسىبي داعدىلار، ەڭبەك نارىعىنىڭ جاي-كۇيى، سونداي-اق بىلىكتى مامانداردى تارتۋ جانە ۇستاپ قالۋ قابىلەتى ەسكەرىلەدى.
ەكونوميكالىق كورسەتكىشتەر بويىنشا استانا 264-ورىنعا، ال الماتى 288-ساتىعا ورنالاستى.
Global Cities Index الەمنىڭ 1000 ءىرى قالاسىن قامتيدى. Oxford Economics ولاردى بەس نەگىزگى باعىت بويىنشا باعالايدى: ەكونوميكا، ادامي كاپيتال، ءومىر ءسۇرۋ ساپاسى، ەكولوگيا جانە مەملەكەتتىك باسقارۋ.
رەيتينگتى جاساۋ بارىسىندا ەكونوميكالىق كورسەتكىشتەر، ءبىلىم جانە ەڭبەك نارىعى، حالىقتىڭ تابىسى، تۇرعىن ءۇي قۇنى، قاۋىپسىزدىك، قورشاعان ورتانىڭ جاي-كۇيى، سونداي-اق ينستيتۋتتار مەن رەتتەۋ ساپاسى ەسكەرىلەدى. 2026 جىلى العاشقى ءۇش ورىندى نيۋ-يورك، لوندون جانە پاريج ساقتاپ قالدى.