25 قىركۇيەكتە الماتى اۋەجايىندا ەرەكشە وقيعا بولدى: «الماتى — استانا» رەيسىنە وتىرعىزۋ كەزىندە جولاۋشىلاردىڭ ءبىرى ۇشاقتان كەنەتتەن ءتۇسىپ كەتتى. كولىك پوليسياسى ەر ادامدى ۇستاپ الىپ، انىقتاۋ ءۇشىن پوليسيا بولىمىنە جەتكىزدى، دەپ حابارلايدى infohub.kz سايتى.
كولىكتەگى پوليسيا دەپارتامەنتىنىڭ دەرەگىنشە، ءتارتىپ بۇزۋشى — استانانىڭ 35 جاستاعى تۇرعىنى. ول قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ بىرنەشە بابى بويىنشا اكىمشىلىك جاۋاپكەرشىلىككە تارتىلدى.
«جولاۋشى ق ر اقبتك-نىڭ بىرنەشە بابى بويىنشا — 434-باپتىڭ 1-بولىگى، 440-باپتىڭ 1-بولىگى، 441-باپتىڭ 1-بولىگى، 566-باپتىڭ 1-بولىگى، 564-باپتىڭ 4-بولىگى بويىنشا اكىمشىلىك جاۋاپكەرشىلىككە تارتىلدى»، — دەلىنگەن حابارلامادا.
اتاپ ايتقاندا، ءسوز قوعامدىق ورىنداردا ماس كۇيدە ءجۇرۋ، ۇشۋ قاۋىپسىزدىگى ەرەجەلەرىن بۇزۋ جانە ۇساق بۇزاقىلىق تۋرالى بولىپ وتىر.
Kozachkov offside Telegram-ارناسى ۇشۋدان باس تارتقان جولاۋشى بوكستان وليمپيادا چەمپيونى دانيار ەلەۋسينوۆ بولعان دەپ حابارلادى. جاريالانىمدا ەر ادام ۇشۋ الدىندا ءدال سول ساتتە ۇشپاۋدى شەشكەنى ايتىلعان.
كولىكتەگى پوليسيا دەپارتامەنتىندە جولاۋشىنىڭ ەسىمىن ناقتىلامادى.
«كولىكتەگى پد زاڭ بارلىعىنا بىردەي ەكەنىن جانە زاڭناما تالاپتارى لاۋازىمىنا، مارتەبەسىنە جانە الەۋمەتتىك جاعدايىنا قاراماستان اركىمگە قاتىستى ەكەنىن ەسكە سالادى. ازاماتتاردى جوعارى قۇقىقتىق مادەنيەت تانىتۋعا، باسقا جولاۋشىلاردىڭ قۇقىقتارىن قۇرمەتتەۋگە جانە كولىك نىساندارىندا ءقاۋىپسىز ورتا قالىپتاستىرۋعا قۇقىق قورعاۋ ورگاندارىنا جاردەمدەسۋگە شاقىرامىز»، — دەپ قوستى پوليسيادا.