الماتى قالاسىنىڭ الاتاۋ اۋدانىندا كەشە تۇندە قايعىلى وقيعا بولدى — جول اپاتىنان ەكى ادام قازا تاپتى، دەپ حابارلايدى infohub.kz سايتى.
جول-كولىك وقيعاسى 27 شىلدە كۇنى ساعات 03:10-دا وڭتۇستىك استانانىڭ الاتاۋ اۋدانىندا بولدى. الدىن الا مالىمەتتەر بويىنشا، Suzuki اۆتوكولىگىنىڭ جۇرگىزۋشىسى رىسقۇلوۆ داڭعىلىمەن باتىس باعىتتا كەلە جاتىپ، ءشارىپوۆ كوشەسىنىڭ قيىلىسىندا كەرى بۇرىلۋ كەزىندە رىسقۇلوۆ داڭعىلىمەن شىعىس باعىتتا كەلە جاتقان Mercedes (گەلەندۆاگەن) اۆتوكولىگىمەن سوقتىعىسقان.
جول-كولىك وقيعاسى سالدارىنان Suzuki اۆتوكولىگىنىڭ جۇرگىزۋشىسى مەن ونىڭ جولاۋشىلارىنىڭ ءبىرى العان جاراقاتتارىنان وقيعا ورنىندا قازا تاپتى. Suzuki اۆتوكولىگىنىڭ تاعى ءبىر جولاۋشىسى مەن Mercedes جۇرگىزۋشىسى ءارتۇرلى دەنە جاراقاتتارىمەن مەديسينالىق مەكەمەگە جەتكىزىلدى.
«ەكى ادامنىڭ ولىمىنە اكەپ سوققان جول-كولىك وقيعاسى بويىنشا الماتى قالالىق پوليسيا دەپارتامەنتىنىڭ تەرگەۋ باسقارماسى قىلمىستىق ءىس قوزعادى. اپاتتىڭ ءمان-جايى انىقتالىپ جاتىر»، — دەپ مالىمدەدى الماتى پد ءباسپاسوز قىزمەتى.