الماتى تۇرعىنى كولىگىنىڭ الدىڭعى ورىندىعىندا جاتقان زاتتارى ءۇشىن ايىپپۇل الدى: كامەرا ولاردى بايلانباعان جولاۋشى دەپ قاتە تانىعان بولۋى مۇمكىن، دەپ حابارلايدى infohub.kz سايتى.
ەۆگەنيا شەستاكوۆا الەۋمەتتىك جەلىدە كامەرا جولاۋشى تاسىمالداۋ ەرەجەسىنىڭ بۇزىلعانىن تىركەگەنىن، الايدا الدىڭعى ورىندىقتا تەك جەكە زاتتارى بولعانىن ايتتى. قاۋلىعا قوسا تىركەلگەن سۋرەتتە سومكەلەر مەن باسقا دا زاتتار كورىنەدى. كولىك يەسىنىڭ پىكىرىنشە، جۇيە ولاردى بايلانباعان جولاۋشى دەپ قاتە تانىعان.
«شىنىن ايتسام، بۇگىن تاڭەرتەڭ ايىپپۇل تۋرالى حابارلامانى كورىپ قاتتى تاڭعالدىم. ال قاۋلىنى اشىپ، كوزىمە ءوزىم سەنبەدىم. ەندى، الدىڭعى جولاۋشى ورنىندا جاتقان سومكەلەر مەن پاكەتتەردى دە بايلاۋ كەرەك سياقتى. ماعان ۇلكەن اق پاكەتكە بايلانىستى ايىپپۇل سالىندى. ءيا، ول كولەمدى، ءبىراق ادامعا مۇلدە ۇقسامايدى. اسىرەسە سۋرەتتە قاراپايىم پاكەت ەكەنى انىق كورىنىپ تۇر. سوندىقتان، قۇرمەتتى قازاقستاندىقتار، ەندى تەك جولاۋشىلاردى عانا ەمەس، سومكەلەر مەن پاكەتتەردى دە بايلاۋعا تۋرا كەلەتىن سياقتى — كەم دەگەندە، ايىپپۇلمەن اينالىسقىڭىز كەلمەسە»، — دەپ پىكىر ءبىلدىردى ەۆگەنيا.
كولىك يەسى ايىپپۇلدى داۋلاماق، سەبەبى كامەرا سالونداعى زاتتاردى بايلانباعان جولاۋشى دەپ قاتە تانىعان دەپ ەسەپتەيدى.
ادۆوكات جاندوس پالمانوۆ بۇرىن تۇسىندىرگەندەي، جۇرگىزۋشىلەر بىرنەشە جاعدايدا قاۋلىعا شاعىمدانا الادى: جاۋاپكەرشىلىككە تارتۋ ءتارتىبى بۇزىلسا، كولىك يەسىنىڭ دەرەكتەرىندە قاتە بولسا، كولىكتىڭ مەملەكەتتىك تىركەۋ ءنومىرى دۇرىس انىقتالماسا، بۇزۋشىلىقتىڭ جەتكىلىكتى دالەلى بولماسا، كامەرانىڭ جارامدىلىعىنا كۇمان تۋسا نەمەسە فوتو جانە بەينەجازبالار ايىپتالعان بۇزۋشىلىقتى راستاماسا. ساراپشى ءار جاعدايدى جەكە باعالاۋ قاجەت ەكەنىن اتاپ ءوتتى.
ادۆوكاتتىڭ ايتۋىنشا، اكىمشىلىك قۇقىق بۇزۋشىلىق تۋرالى قاۋلىعا ونى العان نەمەسە تابىس ەتكەن كۇننەن باستاپ 10 تاۋلىك ىشىندە شاعىمدانۋعا بولادى. مەرزىم وتسە دە، شاعىمدانۋ قۇقىعى جوعالمايدى: دالەلدى سەبەپتەر بولسا، ۋاكىلەتتى ورگانعا نەمەسە سوتقا ءوتىنىش بەرىپ، مەرزىمدى قالپىنا كەلتىرۋگە بولادى. زاڭگەر شاعىم بەرۋدەن بۇرىن قاۋلىنى مۇقيات زەردەلەپ، بۇزۋشىلىقتى تىركەۋدىڭ بارلىق ماتەريالدارىن ساقتاپ، ءوز دالەلدەمەلەرىڭىزدى — بەينەجازبالاردى، سۋرەتتەردى، كۋالاردىڭ ايعاقتارىن جانە باسقا قۇجاتتاردى جيناۋدى ۇسىنادى.
شاعىمدى eGov جانە eOtinish پلاتفورمالارى، اكىمشىلىك قۇقىق بۇزۋشىلىقتاردىڭ ءبىرىڭعاي ءتىزىلىمى (ءاقبت) ارقىلى، سونداي-اق الماتى قالاسى پوليسيا دەپارتامەنتىنىڭ اكىمشىلىك پوليسيا باسقارماسىنىڭ اكىمشىلىك تاجىريبە بولىمىنە جەكە بارىپ (بايتۇرسىنوۆ كوشەسى، 185ب) بەرۋگە بولادى.