الماتى ءماسليحاتىنىڭ كەزەكتەن تىس سەسسياسىندا قالا اكىمىنىڭ ورىنباسارى بەيبىت شاحانوۆ كەشەندى قالا قۇرىلىسى ساراپتاماسىنان وڭ قورىتىندى العان 2040 جىلعا دەيىنگى باس جوسپاردى تۇزەتۋ جوباسىنىڭ نەگىزگى ەرەجەلەرىن تانىستىردى، دەپ حابارلايدى infohub.kz سايتى.
ونىڭ ايتۋىنشا، باس جوسپاردى تۇزەتۋ جۇمىسىنىڭ ماڭىزدى بولىگى قالا تۇرعىندارىمەن ءوزارا ءىس-قيمىل بولدى. قوعامدىق تالقىلاۋلار بارىسىندا تۇسكەن ۇسىنىستار مەن وتىنىشتەر تالدانىپ، زاڭناما مەن قالا قۇرىلىسى شەكتەۋلەرىن ەسكەرە وتىرىپ، مۇمكىن بولعان جەرلەردە جوبالىق شەشىمدەردە كورىنىس تاپتى. ستراتەگيالىق ەكولوگيالىق باعالاۋعا جانە باس جوسپاردى ىسكە اسىرۋدى ودان ءارى قوعامدىق باقىلاۋعا ەرەكشە نازار اۋدارىلدى.
«باس جوسپاردى ودان ءارى ىسكە اسىرۋدىڭ ماڭىزى زور. قۇجاتتى بەكىتۋ قالانىڭ ودان ءارى دامۋىنىڭ نەگىزى بولىپ تابىلادى، الايدا وندا كوزدەلگەن شەشىمدەردى دايەكتى ورىنداۋ نەگىزگى كەزەڭ بولماق. وسىعان بايلانىستى باس جوسپاردىڭ ىسكە اسىرىلۋىن، قۇرىلىس پارامەترلەرىنىڭ ساقتالۋىن، الەۋمەتتىك جانە ينجەنەرلىك ينفراقۇرىلىمنىڭ ۋاقتىلى دامۋىن، سونداي-اق جاسىل جانە تابيعي اۋماقتاردىڭ ساقتالۋىن ۇنەمى مونيتورينگىلەۋدى قامتاماسىز ەتۋ قاجەت. حالىقپەن كەرى بايلانىس جانە تۇرعىنداردى نەگىزگى جوبالاردىڭ ىسكە اسىرىلۋى تۋرالى حاباردار ەتۋ ماڭىزدى قۇرامداس بولىك بولىپ قالا بەرەدى. بۇل قالا قۇرىلىسى شەشىمدەرىنىڭ اشىقتىعىن ارتتىرىپ، دەموگرافيالىق، كولىكتىك، ەكولوگيالىق جانە الەۋمەتتىك جاعدايدىڭ وزگەرىستەرىن ۋاقتىلى ەسكەرۋگە مۇمكىندىك بەرەدى»، – دەپ اتاپ ءوتتى بەيبىت شاحانوۆ.
اكىم ورىنباسارى اتاپ وتكەندەي، جاڭارتىلعان قۇجات وزەكتى دەرەكتەرگە نەگىزدەلگەن جانە ەكولوگيالىق، سەيسميكالىق، كولىكتىك، الەۋمەتتىك جانە ينفراقۇرىلىمدىق شەكتەۋلەردى ەسكەرە وتىرىپ، قالانىڭ تەڭگەرىمدى دامۋىنا باعىتتالعان.
«قالانىڭ الدىندا الماتىنىڭ تابيعي الەۋەتىن ساقتاۋ، جايلى قالالىق ورتانى قامتاماسىز ەتۋ، كولىك بايلانىسىن ارتتىرۋ، حالىقتىڭ ءوسۋى ءۇشىن قاجەتتى جاعدايلار جاساۋ جانە سونىمەن بىرگە قالانىڭ تاريحي بىرەگەيلىگىن ساقتاۋ مىندەتى تۇر»، – دەپ قوستى بەيبىت شاحانوۆ.