الماتى قالاسى ساۋلەت جانە قالا قۇرىلىسى باسقارماسىنىڭ باسشىسى الماس جاڭبىرشى ءماسليحات سەسسياسىندا دەپۋتاتتارعا قالانىڭ قاي اۋداندارىندا قۇرىلىس جۇرگىزۋگە تىيىم سالىنعانىن ءتۇسىندىردى، دەپ حابارلايدى infohub.kz سايتى.
كەزەكتى ءماسليحات سەسسياسىندا تاۋ بوكتەرىندەگى اۋماقتاردى يگەرۋ ماسەلەسىن دەپۋتات ەركىن راقىشيەۆ كوتەردى. ول باس جوسپاردى تۇزەتۋ قالا تۇرعىندارىنىڭ سۇيىكتى دەمالىس ورىندارىن تۇرعىن ءۇي كەشەندەرىنىڭ قۇرىلىسىنان قورعاۋدى كوزدەيتىنىن سۇرادى.
«باس جوسپاردى تۇزەتۋ قالا تۇرعىندارى دەمالىپ، سەرۋەندەيتىن جەرلەردە تۇرعىن ءۇي كەشەندەرىن سالۋعا تىيىم سالۋدى كوزدەي مە؟ قۇرىلىسقا تولىعىمەن تىيىم سالىناتىن ايماقتار انىقتالدى ما؟ ءبىز الەۋمەتتىك جانە تۋريستىك نىساندار ءۇشىن ينفراقۇرىلىمدى دامىتۋ قاجەتتىگىن تۇسىنەمىز، الايدا تابيعاتتى ساقتاپ، تۇرعىنداردىڭ قاۋىپسىزدىگىن قامتاماسىز ەتۋگە مۇمكىندىك بەرەتىن شەكارا قايدا وتەدى؟» — دەپ سۇرادى دەپۋتات.
الماتى قالاسى ساۋلەت جانە قالا قۇرىلىسى باسقارماسىنىڭ باسشىسى الماس جاڭبىرشى ءتيىستى شەكتەۋلەر قالا قۇرىلىسى قۇجاتتارىندا قاراستىرىلعانىن مالىمدەدى.
ونىڭ ايتۋىنشا، قالانىڭ جوعارعى بولىگىندە قۇرىلىستىڭ بيىكتىگىنە شەكتەۋ قويىلعان. بۇل تالعار تراكتىسى، شىعىس اينالما اۆتوموبيل جولى، ءال-فارابي داڭعىلى، سايىن كوشەسى، جاندوسوۆ كوشەسى (سايىننان قالا شەكاراسىنا دەيىن) بويىمەن وتەتىن شەكارادان وڭتۇستىكتەگى اۋماققا قاتىستى.
«بۇل ايماقتا نىسانداردىڭ بيىكتىگى 12 مەتردەن اسپاۋى ءتيىس. دەنساۋلىق ساقتاۋ، ءبىلىم بەرۋ، مادەنيەت جانە ءدىني ماقساتتاعى نىساندار ءۇشىن بيىكتىك 25 مەترگە دەيىن رۇقسات ەتىلەدى. قالانىڭ بۇل بولىگىندە كوپقاباتتى تۇرعىن ۇيلەردى سالۋعا تىيىم سالىنعان»، — دەپ ءتۇسىندىردى الماس جاڭبىرشى.
سونىمەن قاتار مەگاپوليستىڭ جوعارعى بولىگىندە تابيعي كلاستەردى ساقتاۋ قاجەتتىلىگىن ەسكەرە وتىرىپ، نەگىزىنەن الەۋمەتتىك جانە تۋريستىك نىسانداردى سالۋ كوزدەلۋدە.
دەپۋتات قۇرىلىسقا مۇلدە جول بەرىلمەيتىن اۋماقتار انىقتالعان-انىقتالماعانىن جەكە ناقتىلادى. جاڭبىرشى قۇرىلىسقا ەڭىسى 15 گرادۋستان اساتىن ۋچاسكەلەردە تىيىم سالىنعانىن جاۋاپ بەردى. سونىمەن قاتار قۇرىلىسقا سۋ قورعاۋ ايماقتارىندا جانە كوشكىن پروسەستەرىنە ۇشىراعان اۋماقتاردا جول بەرىلمەيدى.
بۇعان دەيىن ءبىز الماتى ءماسليحاتىنىڭ دەپۋتاتتارى كەزەكتەن تىس سەسسيادا قالانىڭ 2040 جىلعا دەيىنگى باس جوسپارىن تۇزەتۋ جوباسىن قاراعانىن جازعان بولاتىنبىز.