الماتىدا ەكى مىڭعا جۋىق ءجۇزۋشى مەن جاتتىقتىرۋشى باسسەينگە قول جەتكىزە الماي قالۋ ءقاۋپى ءتونىپ تۇر: كورشى تۇرعىن ءۇي كەشەنىنىڭ تۇرعىنىنىڭ شاعىمىنان كەيىن سپورت كەشەنىن ءىشىنارا بۇزۋ ماسەلەسى كوتەرىلىپ وتىر، دەپ حابارلايدى infohub.kz سايتى.
باسسەين سەگىز جىلدان بەرى جۇمىس ىستەپ تۇر، مۇندا كۇن سايىن 300-گە جۋىق ادام، ونىڭ ىشىندە بالالار جاتتىعادى. كوپتەگەن سپورتشىلار ءۇشىن بۇل نىسان سپورتتىق مانساپتىڭ باستاپقى نۇكتەسىنە اينالدى. سونىڭ ىشىندە بىرنەشە رەت جارىستاردىڭ جۇلدەگەرى اتانعان 12 جاستاعى توقجان تويلىبەك تە بار.
«ءبىزدىڭ باسسەيندى جاپپاۋدى سۇرايمىن، ويتكەنى باسقا بالالار دا ءبىز سياقتى جاتتىققىسى كەلەدى. مەن وسى باسسەيندە جەتى جىل بويى جاتتىعىپ كەلەمىن جانە جاتتىقتىرۋشىمنىڭ ەڭبەگى مەن اتا-انامنىڭ قولداۋىنىڭ ارقاسىندا بيىكتەرگە جەتتىم»، — دەدى جاس سپورتشى.
شامامەن ءبىر جىل بۇرىن باسسەينگە كورشى تۇرعىن ءۇي كەشەنىنىڭ تۇرعىنىنان شاعىم تۇسە باستادى: ونىڭ ايتۋىنشا، عيمارات ونىڭ پاتەرىنە كۇن ساۋلەسىنىڭ تۇسۋىنە كەدەرگى كەلتىرەدى. سپورت كلۋبىندا ايەل اقشالاي وتەماقى العان جاعدايدا شاعىمىن قايتارىپ الۋعا دايىن بولعانىن ايتادى.
«ول ارىزدارى ارقىلى فيتنەس-كلۋبتان اقشا بوپسالاعان. 230 ميلليون تەڭگە بەرىلگەن كەزدە ول ۇستالىپ، الماتى قالاسىنىڭ ۋاقىتشا ۇستاۋ يزولياتورىنا جەتكىزىلدى. بۇل ءىس 194-باپ بويىنشا — ەرەكشە ءىرى مولشەردە بوپسالاۋ — سوتقا بەرىلدى»، — دەدى سپورت كلۋبىنىڭ اكىمشىسى ناگيرا باۋدينوۆا.
شاعىمنان كەيىن تەكسەرۋ جۇرگىزىلىپ، كوميسسيا قۇرىلىستىڭ ءبىر بولىگى قاجەتتى رۇقسات قۇجاتتارىنسىز سالىنعانىن انىقتادى. مەنشىك يەسى جاۋاپكەرشىلىككە تارتىلىپ، بۇزۋشىلىقتاردى جويۋ مىندەتتەلدى. ءىس سوتقا دەيىن جەتىپ، سوت باسسەيندى ءىشىنارا بۇزۋ تۋرالى شەشىم شىعاردى.
الماتى قالاسىنىڭ قالا قۇرىلىسىن باقىلاۋ باسقارماسى ناۋرىزباي اۋداندىق سوتىنىڭ 2025 جىلعى 5 جەلتوقسانداعى شەشىمى باسقارمانىڭ تالابىن قاناعاتتاندىرعانىن حابارلادى. سوت اكتىسى الماتى قالالىق سوتىنىڭ 2026 جىلعى 28 قاڭتارداعى قاۋلىسىمەن جانە قازاقستان كاسساسيالىق سوتىنىڭ 2026 جىلعى 28 شىلدەدەگى قاۋلىسىمەن وزگەرىسسىز قالدىرىلدى. قازىرگى ۋاقىتتا اتقارۋشىلىق قۇجات الماتى قالاسىنىڭ ادىلەت دەپارتامەنتىندە ورىندالۋدا.
بۇزۋدىڭ ناقتى قاشان باستالاتىنى ازىرگە بەلگىسىز. شەشىم زاڭدى كۇشىنە ەنىپ، سوت ورىنداۋشىلارىنا بەرىلدى. اتا-انالار، جاتتىقتىرۋشىلار مەن سپورتشىلار باسسەيندى ساقتاپ قالۋعا ۇمىتتەنۋدە.