الماتى مەن ەلدىڭ وڭتۇستىك وڭىرلەرىندەگى اۋقىمدى ەلەكتر جارىعىنىڭ ءسونۋى قالالاردىڭ قۇرىلىس قارقىنىنا ينفراقۇرىلىمنىڭ ۇلگەرمەي جاتقانى تۋرالى ماسەلەنى تاعى دا كوتەردى. ەكونوميست، ۇلتتىق ەكونوميكا مينيسترلىگى جانىنداعى قوعامدىق كەڭەستىڭ ءتوراعاسى، بجزق تاۋەلسىز ديرەكتورى ەلدار شامسۋتدينوۆ قۋات تاپشىلىعى جۇيەلى ماسەلەگە اينالىپ بارا جاتقانىن ايتادى، دەپ حابارلايدى infohub.kz.
ول ءوزىنىڭ Telegram-ارناسىندا قازاقستاندا تۇرعىن ءۇي كوبىنەسە قاجەتتى كوممۋنالدىق جانە ەنەرگەتيكالىق ينفراقۇرىلىمنان جىلدام سالىنىپ جاتقانىنا نازار اۋداردى.
«پاتەرلەر كرانداعى سۋدان تەزىرەك پايدا بولدى. جەلىلەرگە تۇسەتىن جۇكتەمە ارتىپ كەلەدى، جاڭا قۋاتتار وعان ىلەسە الماي وتىر»، – دەدى شامسۋتدينوۆ.
ونىڭ ايتۋىنشا، بۇل جاعداي استانادا دا بايقالعان. 2022 جىلى 2،4 ملن شارشى مەتر تۇرعىن ءۇي پايدالانۋعا بەرىلگەننەن كەيىن، 2023 جىلى ەلوردا سۋ تاپشىلىعىنا تاپ بولدى. ەكونوميست ەلدىڭ باسقا ءىرى قالالارىندا دا وسىنداي ءقاۋىپ بار دەپ سانايدى.
وسى ايادا الماتى 14 تامىزدا اۋقىمدى بلەكاۋتقا ۇشىراعان وڭىرلەردىڭ قاتارىندا بولدى. ق ر ەنەرگەتيكا مينيسترلىگىنىڭ حابارلاۋىنشا، سەبەپ – ورتالىق ازيا ەنەرگوجۇيەلەرى تاراپىنان ەلەكتر ەنەرگياسى اعىنىنىڭ كۇرت وزگەرۋىنەن تۋىنداعان قۋاتتىڭ اۆاريالىق تەڭگەرىمسىزدىگى.
سالدارىنان ۇلتتىق ەنەرگوجۇيەنى اۋىر زارداپتاردان قورعاۋ ءۇشىن تۇتىنۋشىلاردىڭ ءبىر بولىگىن ۋاقىتشا وشىرگەن اۆارياعا قارسى اۆتوماتتاندىرۋ ىسكە قوسىلدى.
ءقازىر جۇيەلىك وپەراتور KEGOC قالپىنا كەلتىرۋ جۇمىستارىن جۇرگىزىپ، جۇكتەمەنى كەزەڭ-كەزەڭىمەن جەلىگە قايتارۋدا. ەنەرگەتيكا مينيسترلىگى جاعدايدى باقىلاۋدا ۇستاپ وتىرعانىن مالىمدەدى.
وشىرۋلەر سالدارىنان الماتىدا باعدارشامدار جۇمىسىن توقتاتتى، مەترو توقتاپ، كەيبىر اۋدانداردا سۋ بەرىلۋدە ۇزىلىستەر بولدى. 2گيس دەرەكتەرى بويىنشا قالاداعى كەپتەلىس 9 باللعا جەتتى.
شامسۋتدينوۆ مۇنداي وقيعالاردى تەك اۆاريالارمەن عانا ەمەس، جيناقتالعان ينفراقۇرىلىمدىق پروبلەمالارمەن بايلانىستىرادى. ونىڭ پىكىرىنشە، ەلەكتر ەنەرگياسى مەن سۋ تۇتىنۋدىڭ ءوسۋى قالالاردى دامىتۋعا جانە جاڭا قۋاتتار سالۋعا نەعۇرلىم سالماقتى كوزقاراستى تالاپ ەتەدى.