الماتىدا بۇگىن، 14 تامىزدا بولعان ءىرى بلەكاۋتتان كەيىن قالپىنا كەلتىرۋ جۇمىستارى جالعاسۋدا. قازىرگى ۋاقىتتا قالاداعى باعدارشامداردىڭ شامامەن 90 پايىزى ەلەكتر جەلىسىنە قوسىلىپ، قالىپتى رەجيمدە جۇمىس ىستەپ تۇر، دەپ حابارلايدى infohub.kz.
الماتى اكىمدىگىنىڭ Telegram-ارناسىندا باعدارشام نىساندارىن قايتا ىسكە قوسۋ كەزەڭ-كەزەڭمەن جۇرگىزىلىپ جاتقانى اتاپ ءوتىلدى. ماماندار جابدىقتى تەكسەرىپ، قالعان نىساندارداعى جۇيەلەردى قايتا ىسكە قوسۋدا. تەحنيكالىق اقاۋلار انىقتالعان جاعدايدا قاجەتتى قالپىنا كەلتىرۋ جۇمىستارى جۇرگىزىلۋدە.
جۇمىس قالاداعى بارلىق باعدارشامنىڭ قالىپتى جۇمىسى تولىق قالپىنا كەلگەنشە جالعاسادى.
ەسكە سالا كەتەيىك، بۇگىن الماتى مەن الماتى وبلىسىندا ءىرى بلەكاۋت بولدى. ەنەرگەتيكا مينيسترلىگىنىڭ مالىمەتىنشە، ونىڭ سەبەبى — ورتالىق ازيا ەنەرگوجۇيەسى تاراپىنان ەلەكتر ەنەرگياسى اعىنىنىڭ كۇرت وزگەرۋىنەن تۋىنداعان ەنەرگوجۇيەدەگى قۋاتتىڭ ارتۋى. سونىڭ سالدارىنان اۆارياعا قارسى اۆتوماتيكا ىسكە قوسىلىپ، قازاقستاننىڭ كەيبىر ايماقتارىندا ءبىرقاتار تۇتىنۋشىلاردىڭ ەلەكتر قۋاتى ءوشىرىلدى.
باعدارشامداردىڭ وشۋىنە بايلانىستى جولداردا كەپتەلىس پايدا بولىپ، قالا تۇرعىندارى وزدەرى جول قوزعالىسىن رەتتەۋگە شىقتى. سونداي-اق سىرتقى ەلەكترمەن جابدىقتاۋ تولىق توقتاعاندىقتان مەتروپوليتەن جۇمىسى ۋاقىتشا توقتاتىلدى، الايدا كەيىن مەترو ادەتتەگى رەجيمگە ورالدى. الماتى پوليسياسى كۇشەيتىلگەن جۇمىس رەجيمىنە كوشتى.