تۇرعىنداردىڭ قۇقىعىن قورعايمىن دەپ، قۇرىلىس كومپانياسىنان اقى تالاپ ەتۋگە بولا ما؟ الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى بۇعان جول جوق دەپ شەشتى. القابيلەر ەرنار راحيمجانوۆتى بوپسالاۋدا كىنالى دەپ تانىدى: تەرگەۋ نۇسقاسى بويىنشا، ول قۇرىلىس كومپانياسىنان ەكى پاتەر ءۇشىن 17 ملرد تەڭگە تالاپ ەتىپ، ونىڭ ورنىنا زاسترويششيككە قارسى ناۋقاندى توقتاتۋعا ۋادە بەرگەن. وسى ءۇشىن ەر ادام سەگىز جىلعا باس بوستاندىعىنان ايىرىلدى، دەپ حابارلايدى infohub.kz سايتى.
ۇكىمگە سايكەس، 2021 جىلى ەرنار راحيمجانوۆ الماتىداعى سۇلەيمەنوۆ كوشەسىندەگى ءتورت پاتەردى اۋكسيوننان ساتىپ الىپ، ونى اناسىنا راسىمدەگەن. ەكى جىل وتكەن سوڭ قاسىندا «الما تاۋ Construction» كومپانياسىنىڭ تۇرعىن ءۇي كەشەنىنىڭ قۇرىلىسى باستالعان. سوت نۇسقاسى بويىنشا، ءدال سول كەزدە ەر ادام كومپانيانى ءوز جىلجىمايتىن مۇلكىن ساتىپ الۋعا ماجبۇرلەۋ جوسپارىن ويلاستىرعان.
2024 جىلى جازدا راحيمجانوۆ قۇرىلىس كومپانياسىنا پاتەرلەردى ساتىپ الۋدى ۇسىنعان. باس تارتقان سوڭ، سوت انىقتاعانداي، ول الەۋمەتتىك جەلىلەردە بەينەلەر جاريالاپ، تۇرعىنداردىڭ جيىندارىن ۇيىمداستىرىپ، ءتۇرلى مەملەكەتتىك ورگاندار مەن باق-قا وتىنىشتەر جىبەرە باستاعان. مۇنىڭ ءبارى، ايىپتاۋ نۇسقاسى بويىنشا، كومپانيا ونىڭ شارتتارىنا كەلىسپەسە، وعان قارسى ناۋقاندى جالعاستىرۋ قاۋپىمەن قاتار جۇرگەن. تالاپ ەتىلەتىن سوما ۇنەمى ءوسىپ، ەكى پاتەردىڭ ءارقايسىسىنا 8،5 ملرد تەڭگەدەن، بارلىعى 17 ملرد تەڭگەگە جەتكەن.
ەرنار راحيمجانوۆ پەن قۇرىلىس كومپانياسى اراسىنداعى قاقتىعىس تاريحى قىلمىستىق ءىس اياسىندا باستالعان جوق. 2024 جىلى ول Orda.kz رەداكسياسىنا ازاماتتىق بەلسەندى رەتىندە حابارلاسىپ، سۇلەيمەنوۆ كوشەسىندەگى تۇرعىن ءۇي كەشەنىنىڭ قۇرىلىسىنا قارسى بولعان. سوندا تۇرعىندار جوبادا كوزدەلگەن بالاباقشانىڭ ورنىنا تاعى ءبىر تۇرعىن ءۇي كەشەنىن سالا باستاعانىن مالىمدەگەن. راحيمجانوۆ قۇرىلىستى توقتاتۋ ءۇشىن اكىمدىككە، پروكۋراتۋراعا، سىبايلاس جەمقورلىققا قارسى قىزمەتكە، سالالىق مينيسترلىكتەرگە جانە باسقا دا مەملەكەتتىك ورگاندارعا ءوتىنىش جولداعانىن ايتقان. Orda.kz جاريالاعان مەملەكەتتىك ورگانداردىڭ جاۋاپتارىندا «الما تاۋ Construction» ج ش س رۇقسات بەرەتىن قۇجاتتاردىڭ تولىق پاكەتىنسىز قۇرىلىسقا كىرىسكەنى ايتىلعان. كەيىن كەيبىر بۇزۋشىلىقتار جويىلعان، الايدا بەلسەندىلەر مەن قۇرىلىس كومپانياسى اراسىنداعى جانجال مۇنىمەن اياقتالماعان.
ءدال وسى كوپجىلدىق قاقتىعىس تاريحىن تەرگەۋ كەيىن بوپسالاۋ سحەماسىنىڭ ءبىر بولىگى دەپ اتادى. ايىپتاۋ نۇسقاسى بويىنشا، شاعىمدار، جاريالانىمدار مەن تۇرعىنداردىڭ جيىندارى كومپانياعا قىسىم كورسەتۋ تاسىلىنە اينالعان. راحيمجانوۆتىڭ ءوزى بۇل باعالاۋمەن كەلىسپەي، تەك زاڭنىڭ ساقتالۋىن تالاپ ەتكەنىن ايتادى.
كومپانيا وكىلىنىڭ پوليسياعا ارىزىنان كەيىن قۇقىق قورعاۋ ورگاندارى جەدەل ءىس-شارالار جۇرگىزدى. ولاردىڭ باقىلاۋىمەن ايىپتالۋشىنىڭ اناسىنىڭ شوتىنا بولاشاق مامىلە ءۇشىن 20 ملن تەڭگە الدىن الا تولەم اۋدارىلدى. بۇل اقشا قىلمىستىق ءىستىڭ ماتەريالدارىنا نەگىز بولدى.
ءىس القابيلەردىڭ قاتىسۋىمەن قارالدى. ولار راحيمجانوۆتى اسا ءىرى مولشەردە بوپسالاۋدا كىنالى دەپ تانىدى. سوت وعان سەگىز جىلعا باس بوستاندىعىنان ايىرۋ جازاسىن تاعايىنداپ، جازاسىن ورتاشا قاۋىپسىزدىك مەكەمەسىندە وتەۋدى بەلگىلەدى. سونىمەن قاتار، قۇرىلىس كومپانياسىنىڭ 20 ملن تەڭگەنى ءوندىرىپ الۋ تۋرالى ازاماتتىق تالابىن سوت قاراۋسىز قالدىردى — تالاپكەر وكىلى بۇل تالاپپەن ازاماتتىق ءىس جۇرگىزۋ تارتىبىمەن بولەك جۇگىنەتىنىن مالىمدەدى. وسى قاراجاتقا سالىنعان تىيىم ساقتالادى.
ۇكىم شىعارىلعاننان كەيىن راحيمجانوۆ پەن ونىڭ ادۆوكاتتارى اپەللياسيالىق شاعىمدار بەردى. ولار ۇكىمنىڭ كۇشىن جويىپ، ءىستى سوتتىڭ باسقا قۇرامىندا قايتا قاراۋعا جىبەرۋدى سۇرايدى. قورعاۋشىلاردىڭ پىكىرىنشە، ءىس ماتەريالدارىندا ەر ادامنىڭ ءوز ارەكەتىنىڭ قۇقىققا قايشى ەكەنىن تۇسىنگەنى جانە بوپسالاۋعا نيەتتەنگەنى تۋرالى دالەلدەر جوق. ال قۇرىلىس كومپانياسىمەن كەلىسسوزدەر، ادۆوكاتتاردىڭ ايتۋىنشا، وعان تيەسىلى جىلجىمايتىن م ۇلىكتى ساتۋدىڭ قاراپايىم ارەكەتى بولعان. سونىمەن قاتار، قورعاۋشىلار ءبىرىنشى ساتىداعى سوت ۇكىمنىڭ نەگىزىنە قىلمىستىق ءىس جۇرگىزۋ زاڭىن بۇزا وتىرىپ الىنعان دالەلدەردى قويعان دەپ سانايدى. الماتى قالالىق سوتى اپەللياسيالىق شاعىمداردى وندىرىسكە قابىلدادى. ولار 21 شىلدەدە قارالادى. وسى ۋاقىتقا دەيىن راحيمجانوۆ قاماۋدا قالادى.