الماتىدا اقشا بوپسالادى دەپ كۇدىكتەلگەن ادامدار ۇستالدى: ولار ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى بولىپ تانىستىرىپ، قارۋمەن قورقىتىپ، مەگاپوليس تۇرعىنىنان اقشا تالاپ ەتكەن، دەپ حابارلايدى infohub.kz سايتى.
ىشكى ىستەر مينيسترلىگىنىڭ ۆەدومستۆولىق سايتى حابارلاعانداي، 10 تامىزدا ءبىر توپ ادام الدىن الا ءسوز بايلاسىپ، جابىرلەنۋشىنى باقىلاپ جۇرگەن. ۇققب قىزمەتكەرلەرى بولىپ تانىستىرىپ، تاپانشامەن قورقىتقان قىلمىسكەرلەر ونى كولىككە ماجبۇرلەپ وتىرعىزىپ، قالا سىرتىنا الىپ شىققان.
«قىسىم كورسەتە وتىرىپ، ولار جابىرلەنۋشىنى تۋىسىنا قوڭىراۋ شالدىرۋعا ماجبۇرلەدى، ول ءوز كەزەگىندە ولار كورسەتكەن نومىرگە 3 ملن تەڭگە اۋدارىپ بەردى»، — دەدى ىىم-دە.
وسى اۋىر قىلمىستى جاساعانى ءۇشىن ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى بۇرىن سوتتالعان ءتورت ادامدى ۇستادى، ولاردىڭ بىرەۋى بۇرىن كىسى ولتىرگەنى ءۇشىن جازاسىن وتەگەن.
«ولاردىڭ بارلىعى ۋاقىتشا ۇستاۋ يزولياتورىنا قامالدى. ءتىنتۋ بارىسىندا ەكى مىلتىق، كارابين، گاز تاپانشاسى جانە وق-دارىلەر تابىلىپ، تاركىلەندى. تەرگەۋ جالعاسۋدا»، — دەدى پوليسيادا.
قۇقىق قورعاۋ ورگاندارى اقتوبە وبلىسىندا دا وسىنداي قىلمىستىق ءىس قوزعالعانىن قوستى. وندا بۇرىن سوتتالعان ءوڭىر تۇرعىنى ۇستالدى، ول دا ۇققب قىزمەتكەرى بولىپ تانىستىرىپ، شانتاج جانە پسيحولوگيالىق قىسىم ارقىلى جەرگىلىكتى تۇرعىنداردان اقشا بوپسالاعان.
«ازاماتتاردى ساق بولۋعا جانە قۇقىق قورعاۋ ورگاندارىنىڭ قىزمەتكەرلەرى بولىپ تانىستىرىپ جۇرگەن ادامداردىڭ قورقىتۋى مەن قىسىمىنا بەرىلمەۋگە شاقىرامىز. وسىنداي جاعدايلار تۋىنداعان كەزدە دەرەۋ پوليسياعا جۇگىنۋ قاجەت. ءىىم ازاماتتاردىڭ قاۋىپسىزدىگى مەن زاڭدى مۇددەلەرىنە قارسى باعىتتالعان قىلمىستاردى انىقتاۋ جانە جولىن كەسۋ جۇمىسىن جالعاستىرادى»، — دەپ قوستى ۆەدومستۆودا.