الماتى قالالىق پەريناتالدىق ورتالىعىندا شۇعىل وتا ەكى ءومىر ءۇشىن كۇرەسكە اينالدى: 35 اپتالىق جۇكتى 40 جاستاعى ايەلگە كەسار تىلىگى جاسالىپ، سونىمەن قاتار ۇلكەن ىسىك الىندى، دەپ حابارلايدى infohub.kz.
مەديسينالىق مەكەمەنىڭ مالىمەتىنشە، ناۋقاس مەزگىلىنەن بۇرىن سۋى كەتىپ تۇسكەن. تەكسەرۋ كەزىندە ۇرىقتىڭ قان اينالىمى بۇزىلعانى انىقتالىپ، شۇعىل بوساندىرۋ تالاپ ەتىلدى. وتا بارىسىندا حيرۋرگتار 20×25 سانتيمەترلىك ميومانى جانە ىشەكتىڭ جاتىرمەن جابىسىپ قالعانىن بايقاعان.
وتاعا الماتى ونكولوگيالىق ورتالىعىنىڭ ونكوگينەكولوگى رايحان بولاتبەكوۆا شاقىرتىلدى. بىرلەسكەن كۇش-جىگەردىڭ ارقاسىندا دارىگەرلەر بوساندىرۋمەن قاتار، سالماعى 5،1 كەلى بولاتىن ىسىكتى الىپ، ناۋقاستىڭ جاتىرى مەن رەپرودۋكتيۆتى قىزمەتىن ساقتاپ قالدى. «ناتيجەسىندە دارىگەرلەر بوساندىرىپ قانا قويماي، 5،1 كەلىلىك ىسىكتى الىپ، ايەلدىڭ جاتىرىن جانە بالا كوتەرۋ قابىلەتىن ساقتاپ قالدى. بۇل بولاشاقتا ونىڭ قايتادان انا بولۋىنا مۇمكىندىك بەرەدى»، – دەلىنگەن حابارلامادا.
سالماعى 2،2 كەلى بولاتىن شارانا شالا تۋىلدى، ءبىراق رەانيماسيادا باقىلاۋدان كەيىن ونىڭ جاعدايى تۇراقتالدى. ءقازىر انا مەن بالا ۇيلەرىنە شىعارىلىپ، وزدەرىن جاقسى سەزىنۋدە.
ادەتتە ميوما تۇيىندەرىنىڭ سالماعى بىرنەشە گرامنان 800 گرامعا دەيىن بولادى، ءبىراق اسقىنعان جاعدايلاردا ولار بىرنەشە كەلىگە جەتۋى مۇمكىن. بۇعان دەيىن قازاقستاندا ءبىر كۇندە 30 قاتەرلى ىسىك جاعدايى انىقتالعانى حابارلانعان بولاتىن.