الماتىدا وتىرۋ ورىندارىن كوبەيتۋدى كوزدەگەن ورتالىق ستاديوندى قايتا جاڭعىرتۋ جوباسى توقتاتىلدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە قالانىڭ بوستاندىق اۋدانىنىڭ اكىمى ازامات قالدىبەكوۆ مالىمدەدى، دەپ حابارلايدى infohub.kz سايتى.
جۋرناليستەر اۋدان اكىمىنەن قالاعا الەم جۇلدىزدارى ءجيى كەلە باستاعانىنا بايلانىستى ورتالىق ستاديونعا كۇردەلى جوندەۋ جۇرگىزىلەتىن-جۇرگىزىلمەيتىنىن سۇرادى.
«بۇرىن ورتالىق ستاديوندى وتىرۋ ورىندارىن كوبەيتە وتىرىپ قايتا جاڭعىرتۋ جوباسى قاراستىرىلعان. الايدا بۇگىندە جاڭا ستاديوننىڭ قۇرىلىسىنا بايلانىستى بۇل توقتاتىلدى»، — دەدى ازامات قالدىبەكوۆ.
ونىڭ ايتۋىنشا، نىسانعا جىل سايىن اعىمداعى جوندەۋ جۇرگىزىلەدى: اۋماق رەتكە كەلتىرىلىپ، اسفالت توسەلەدى، قاسبەت جۇمىستارى جۇرگىزىلەدى.
«ورتالىق ستاديوندى كەشەندى كۇردەلى جوندەۋ ماسەلەسى كۇن تارتىبىندە تۇر، ول قاراستىرىلۋدا»، — دەپ سەندىردى قالدىبەكوۆ. سونىمەن قاتار ونىڭ ايتۋىنشا، كۇردەلى جوندەۋدىڭ ناقتى مەرزىمى ازىرگە بەلگىسىز.
ەسكە سالايىق، 2025 جىلدىڭ تامىزىندا الماتىدا حالىقارالىق دەڭگەيدەگى زاماناۋي ستاديون سالىناتىنى بەلگىلى بولعان. سول جىلدىڭ جەلتوقسانىندا ستاديون 35 مىڭ ورىنعا ەسەپتەلگەنى حابارلاندى. سونداي-اق سپورت نىسانىنىڭ ماكەتى جاريالانعان.
الايدا جاقىندا الماتى اكىمدىگىندە ۋەفا ستاندارتتارى بويىنشا سالىنىپ جاتقان ستاديون 35 مىڭ ەمەس، 45 مىڭ ورىنعا ەسەپتەلگەنىن مالىمدەدى. ونىڭ سىرتقى كورىنىسى دە باسقاشا بولادى.