الماتىدا ساينا كوشەسىندە Changan مەن Hyundai Elantra اۆتوكولىكتەرى سوقتىعىسىپ، ەكى جولاۋشى زارداپ شەكتى، دەپ حابارلايدى infohub.kz سايتى.
پوليسيا دەپارتامەنتىنىڭ الدىن الا مالىمەتىنشە، Changan اۆتوكولىگىنىڭ جۇرگىزۋشىسى سولتۇستىككە قاراي كەلە جاتىپ، جول جوندەۋ ۋچاسكەسىنىڭ الدىندا جىلدامدىقتى باسەڭدەتكەن. ارتىنان كەلە جاتقان Hyundai Elantra ءقاۋىپسىز اراقاشىقتىقتى ساقتاماي، سوقتىعىسقان. سوققىنىڭ كۇشىنەن Changan اۆتوكولىگى ينەرسيامەن بورديۋرگە شىعىپ كەتكەن.
اپات سالدارىنان Hyundai Elantra كولىگىندەگى ەكى جولاۋشىعا مەديسينالىق كومەك قاجەت بولدى. ولارعا قاجەتتى كومەك كورسەتىلدى، دەپ حابارلادى ۆەدومستۆو.
وقيعانىڭ ءمان-جايىن پوليسيا قىزمەتكەرلەرى انىقتاپ جاتىر. پوليسيا جۇرگىزۋشىلەرگە ءقاۋىپسىز اراقاشىقتىقتى ساقتاۋ قاجەتتىگىن ەسكەرتەدى، اسىرەسە جول جوندەۋ جۇمىستارى ءجۇرىپ جاتقان ۋچاسكەلەردە، سەبەبى جول جاعدايى بىرنەشە سەكۋند ىشىندە وزگەرۋى مۇمكىن، دەپ اتاپ ءوتتى.