الماتىدا كوللەدج تۇلەگى ديپلومىن جىرتقان ۆيدەو جاريالاپ، اكىمشىلىك جاۋاپكەرشىلىككە تارتىلدى، دەپ حابارلايدى infohub.kz.
پوليسيا قىزمەتكەرلەرى الەۋمەتتىك جەلىلەردى مونيتورينگتەۋ بارىسىندا TikTok پلاتفورماسىندا قوعامدا قىزۋ تالقىلانعان ۆيدەونى انىقتادى.
بەينەجازبادا الماتىداعى جەكە كوللەدجدەردىڭ ءبىرىنىڭ تۇلەگى ديپلوم تاپسىرۋ راسىمىنەن كەيىن ديپلومنىڭ مۇقاباسىنا ۇقساس زاتتى كوپشىلىك الدىندا جىرتقان.
تەكسەرۋ بارىسىندا ديپلومنىڭ ءتۇپنۇسقاسى، وعان قوسىمشا جانە وقۋ ورنى بەرگەن رەسمي مۇقاباسى زاقىمدانباعانى انىقتالدى. ۆيدەو ءتۇسىرۋ ءۇشىن الدىن الا دايىندالعان مۇقابانىڭ كوشىرمەسى پايدالانىلعان.
وسىعان قاراماستان، روليك ينتەرنەتتە كەڭ تارالىپ، جەلى قولدانۋشىلارى اراسىندا ءارتۇرلى پىكىرلەر تۋعىزدى. بۇل فاكت پوليسيانىڭ تەكسەرۋ جۇرگىزۋىنە نەگىز بولدى.
تەكسەرۋ قورىتىندىسى بويىنشا ۆيدەو اۆتورى قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 456-2-بابىنىڭ 3-1-بولىگى بويىنشا اكىمشىلىك جاۋاپكەرشىلىككە تارتىلدى.