Almaty Air Initiative قورى الماتىدا لاستانعان اۋانىڭ ادام اعزاسىنا قالاي ەنەتىنىن كورسەتۋ ءۇشىن ەكسپەريمەنت وتكىزدى. قالانى كەزىپ سەرۋەندەگەن سوڭ ميكروسكوپتان نە كورىنگەنىن Kursiv LifeStyle جازىپ، infohub.kz سايتى حابارلادى.
زەرتتەۋگە بەس ەرىكتى قاتىستى. ولار تاڭەرتەڭ زەرتحاناعا كەلىپ، ءارقايسىسىنان العاشقى قان ۇلگىسى الىندى. سودان كەيىن قاتىسۋشىلار ساتپايەۆ — جاروكوۆ — اباي — روزىباكييەۆ ارالىعىنداعى كوشەلەرمەن سەرۋەندەۋگە شىقتى.
ەكى ەرىكتى KN95 قورعانىش رەسپيراتورلارىمەن ءجۇردى، قالعاندارى ماسكاسىز بولدى. سەرۋەن بارىسىندا داچيك PM2،5 بولشەكتەرىنىڭ كونسەنتراسياسىن 10–15 مكگ/م³ دەڭگەيىندە تىركەدى.
قايتىپ كەلگەن سوڭ قاتىسۋشىلاردان قايتا قان الىنىپ، ول جارىق ميكروسكوپىمەن زەرتتەلدى. سەرۋەنگە دەيىن ۇلگىلەردە ايقىن بوگدە ەلەمەنتتەر تابىلماعان. سەرۋەننەن كەيىن رەسپيراتورسىز قاتىسۋشىلاردىڭ جەكەلەگەن ەريتروسيتتەرىندە قارا داقتار پايدا بولدى.
قور جەتەكشىسى جۇلدىز ساۋلەبەكوۆانىڭ ايتۋىنشا، اۋانىڭ لاستانۋى سىرتتا عانا قالمايدى. ۇساق بولشەكتەر قان اعىمىنا ەنىپ، ونىمەن بۇكىل اعزاعا تارالا الادى.
«Queen Mary University of London زەرتتەۋى مەن Almaty Air Initiative ەكسپەريمەنتى راستايدى — ادام كولىك قوزعالىسى قارقىندى جولدىڭ جانىندا بولعان سوڭ قانىندا پايدا بولاتىن كومىرتەگى مەن مەتالل بار بولشەكتەردىڭ ىقتيمالدىعى جوعارى. ولار پايدالانىلعان گازدارعا، تەجەگىش پەن شينانىڭ توزۋىنا ءتان»، — دەپ جازادى Almaty Air Initiative.
بۇعان دەيىن Kursiv LifeStyle الماتى اۋاسىنىڭ جاي-كۇيى مەملەكەتتىك ورگانداردىڭ نۇسقاسى بويىنشا باسقا ولشەمدەردەن قانشالىقتى وزگەشە ەكەنىن جازعان. كەيبىر جاعدايدا كورسەتكىشتەر اراسىنداعى ايىرما 27 ەسەگە جەتەدى.