الماتىدا 44 جاستاعى ەر ادام ەلەكتروساموكاتتان قۇلاپ، قازا تاپتى. بۇل وقيعا تۇندە ۆارلاموۆ كوشەسىندە، تولە بي داڭعىلىنىڭ ماڭىندا بولعان، دەپ حابارلايدى infohub.kz.
الدىن الا مالىمەتتەر بويىنشا، ەر ادام باسقارۋدى جوعالتىپ، بورديۋرگە سوعىلىپ، قۇلاعان. پوليسيا قازىرگى ۋاقىتتا وقيعانىڭ ءمان-جايىن انىقتاپ جاتىر.
قۇلاۋ سالدارىنان الماتىلىق ومىرمەن سىيىسپايتىن جاراقات العان. وقيعا ورنىنا كەلگەن دارىگەرلەر رەانيماسيالىق شارالار جۇرگىزگەنىمەن، ەر ادامدى قۇتقارۋ مۇمكىن بولمادى.
الدىن الا اقپارات بويىنشا، ول ءجۇرۋ كەزىندە قورعانىس دۋلىعاسىن جانە باسقا دا جەكە قورعانىس قۇرالدارىن كيمەگەن.
پوليسيا ەلەكتروساموكات پايدالانۋشىلارىنا قاۋىپسىزدىك شارالارىن ساقتاۋدى، قورعانىس دۋلىعاسىن جانە باسقا دا قورعانىس قۇرالدارىن قولدانۋدى ەسكەرتەدى.
بۇعان دەيىن 25 تامىزدان باستاپ ەلەكتروساموكاتتارعا تروتۋارلاردا جۇرۋگە تىيىم سالىنعانى حابارلانعان. ولار ۆەلوجولداردا، ۆەلوسيپەد جولاقتارىندا جانە جولدىڭ جيەگىندە جۇرە الادى. پوليسيا ەرەجەلەردىڭ ساقتالۋىن ەلەكتروساموكاتتاعى پاترۋلدەر، بەينەباقىلاۋ كامەرالارى جانە دروندار ارقىلى باقىلاۋدى جوسپارلاپ وتىر.
ءىىم دەرەكتەرىنە سايكەس، جىل باسىنان بەرى ەلەكتروساموكاتتاردىڭ قاتىسۋىمەن 139 جول-كولىك وقيعاسى تىركەلگەن، وندا ەكى ادام قازا تاپقان. سونىمەن قاتار، 1 شىلدەدەن باستاپ ەلەكتروساموكات پايدالانۋشىلارى جول قوزعالىسىنىڭ تولىققاندى قاتىسۋشىلارى بولدى: جاياۋ جۇرگىنشىگە باسىمدىق بەرمەگەنى ءۇشىن 2 اەك — 8 650 تەڭگە كولەمىندە ايىپپۇل قاراستىرىلعان.