جىل باسىنان بەرى الماتىدا جول قوزعالىسى ەرەجەلەرىن بۇزعانى ءۇشىن 18 مىڭنان استام ەلەكتروساموكات پايدالانۋشىسى جاۋاپكەرشىلىككە تارتىلدى، دەپ حابارلايدى infohub.kz.
وڭىرلىك كوممۋنيكاسيالار قىزمەتىندە وتكەن بريفينگتە الماتى قالالىق پوليسيا دەپارتامەنتىنىڭ قوعامدىق قاۋىپسىزدىك باسقارماسىنىڭ باستىعى تيمۋر نوعايبايەۆ ساموكات جۇرگىزۋشىلەرى اراسىنداعى بۇزۋشىلىقتاردى انىقتاۋ ادىستەرى تۋرالى ايتتى.
ونىڭ ايتۋىنشا، ەلەكتروساموكاتتاردى پايدالانۋدى رەتتەيتىن جانە ولاردى تولىققاندى كولىك قۇرالى دەپ تانيتىن جاڭا زاڭنامالىق تالاپتار ەنگىزىلدى. ساموكات باسقاراتىندار مەن كيكشەرينگ كومپانيالارى ءۇشىن ءبىرقاتار مىندەتتەمەلەر قاراستىرىلعان.
دايىندىق كەزەڭىندە قالاداعى جول قاۋىپسىزدىگى مەن قۇقىقتىق ءتارتىپتى قامتاماسىز ەتۋ ءۇشىن قولدانىلاتىن اۆتوماتتاندىرىلعان جۇيەلەرمەن، ونىڭ ىشىندە «سەرگەك» جۇيەسىمەن بەلسەندى جۇمىس جۇرگىزىلدى. قازىرگى ۋاقىتتا كيكشەرينگ كومپانيالارىنىڭ دەرەكتەرىن پوليسيا مەن «سەرگەك» دەرەكقورىمەن بىرىكتىرۋ جۇمىستارى جۇرگىزىلۋدە، بۇل ەلەكتروساموكات جۇرگىزۋشىلەرى جىبەرەتىن قۇقىق بۇزۋشىلىقتاردى جەدەل انىقتاۋعا مۇمكىندىك بەرەدى.
تيمۋر نوعايبايەۆ ءقازىر بۇزۋشىلىقتاردى پاترۋلدىك پوليسيا، ۋچاسكەلىك ينسپەكتورلار جانە ءموبيلدى ەلەكتروپاترۋلدەر انىقتايتىنىن قوستى.