الماتىدا 54 جاستاعى ەر ادام ەلەكتروساموكاتپەن ءجۇرىپ، جول-كولىك وقيعاسىندا قازا تاپتى. الدىن الا دەرەكتەرگە قاراعاندا، ول شىعىس اينالما اۆتوجولىمەن شامامەن 90 كم/ساع جىلدامدىقپەن كەلە جاتقان، دەپ حابارلايدى infohub.kz سايتى.
اپات تۇندە بولعان. بەينەباقىلاۋ كامەرالارى مەن ۆيدەوتىركەگىشتەردىڭ كادرلارىندا كورىنگەندەي، ساموكات جۇرگىزۋشىسى جولدىڭ سول جاق شەتىمەن كەلە جاتىپ، الدىنداعى كولىكتى باسىپ وزۋعا بەل بۋدى. باسىپ وزۋ كەزىندە ول رولگە يە بولا الماي، اسفالتقا قۇلادى. سوققىدان ەر ادامنىڭ قورعانىش دۋلىعاسى ۇشىپ كەتتى.
وقيعا ورنىنا پوليسەيلەر مەن جەدەل جاردەم كەلدى، الايدا زارداپ شەككەن ادام العان جاراقاتىنان كوز جۇمدى. وقيعا فاكتىسى بويىنشا سوتقا دەيىنگى تەرگەۋ باستالىپ، بولعان جايدىڭ بارلىق ءمان-جايى انىقتالۋدا.
پوليسيانىڭ مالىمەتىنشە، جىل باسىنان بەرى الماتىدا ەلەكتروساموكات قاتىسقان 91 جول-كولىك وقيعاسى تىركەلىپ، ولاردا 96 ادام جاراقات العان.
تامىز ايىنىڭ سوڭىندا «كۋرسيۆ» ۆارلاموۆ كوشەسىندە ەلەكتروساموكاتتان قۇلاعان 44 جاستاعى الماتىلىقتىڭ قازا تاپقانىن جازعان بولاتىن. سونىمەن قاتار ءىىم دەرەگىنشە، 2026 جىلدىڭ 8 ايىندا قازاقستاندا ەلەكتروساموكات قاتىسقان 139 جول-كولىك وقيعاسى تىركەلىپ، ولاردا ەكى ادام قازا تاپتى.
پوليسيا ەلەكتروساموكاتتىڭ جول قوزعالىسىنا قاتىسۋشى ەكەنىن جانە ونى پايدالانۋ ەرەجەلەردى ساقتاۋدى تالاپ ەتەتىنىن ەسكە سالدى.
بۇعان دەيىن كۋرسيۆ اۆتو 25 تامىزدان باستاپ ساموكاتتارعا ارنالعان جقە-گە ەلەۋلى وزگەرىستەر كۇشىنە ەنگەنىن جازعان ەدى.