الماتىنىڭ جەتىسۋ اۋدانىندا ەسەنتاي وزەنى بويىمەن چەرنوۆيسكايا كوشەسىنەن سامىرسىنعا دەيىنگى ارالىقتا جاعالاۋ قۇرىلىسى باستالدى. جاڭا دەمالىس ايماعىنىڭ ۇزىندىعى 1200 مەتردى قۇرايدى، دەپ حابارلايدى infohub.kz.
قالالىق اكىمدىكتىڭ مالىمەتىنشە، جوبا اياسىندا وزەن ارناسىن تازارتۋ جانە سەرۋەن ايماعىن جاساۋ جوسپارلانعان. قوعامدىق كەڭىستىك اۋماعىنا 3700 شارشى مەتر برۋسچاتكا توسەلىپ، 230 شارشى مەتر اۆتوتۇراق جاسالىپ، 6850 شارشى مەتر كوگالداندىرۋ جۇمىستارى جۇرگىزىلەدى. سونداي-اق ۇزىندىعى 1،2 شاقىرىم بولاتىن 120 جارىق تىرەۋى، 50 ورىندىق پەن قوقىس جاشىگى جانە ەكى ىڭعايلى دارەتحانا ورناتىلادى.
دەمالىس ايماعىن قۇرۋعا ەرەكشە كوڭىل بولىنگەن: مۇندا بالالار مەن سپورت الاڭدارى، سكەيت الاڭى جانە جاياۋ جۇرگىنشىلەر جولدارى پايدا بولادى. بالالارعا ارنالعان اتكەنشەك، سىرعاناق جانە ورمەلەۋ قۇرىلعىلارى موتوريكا مەن دەنە بەلسەندىلىگىن دامىتۋعا ىقپال ەتەدى.
كوپىر وتكەلدەرىن قايتا جاڭارتۋ جاياۋ جۇرگىنشىلەر مەن ۆەلوسيپەدشىلەر ءۇشىن قاۋىپسىزدىك پەن قولجەتىمدىلىكتى قامتاماسىز ەتەدى: تروتۋارلار مەن ۆەلوجولدار سالىنىپ، اۆتوماتتى سۋارۋ جۇيەسى ورناتىلادى.
«جاڭا قوعامدىق كەڭىستىك وزەن جاعالاۋىن قالا ىشىندەگى بىرەگەي تابيعي ساياباققا اينالدىرادى. قۇرىلىس جۇمىستارى 2024 جىلدىڭ ەكىنشى توقسانىنىڭ سوڭىنا دەيىن اياقتالادى»، — دەدى قالالىق اكىمدىكتە.
بۇعان دەيىن الماتى اكىمى ەربولات دوسايەۆ ەسەنتاي وزەنىندە جاعالاۋ سالۋ تۋرالى ايتىپ، جۇمىستاردى ماۋسىم ايىنىڭ سوڭىنا دەيىن اياقتاۋدى تاپسىرعان بولاتىن. سونداي-اق، ناۋرىزباي اۋدانىندا ۇزىندىعى 7،7 شاقىرىم بولاتىن قارعالى وزەنىنىڭ جاعالاۋىن قايتا جاڭارتۋ باستالدى.