الماتىدا پوليسيا قىزمەتكەرلەرى ەسىرتكى تاراتۋعا كۇدىكتى ايەلدىڭ ارەكەتىن توقتاتتى، دەپ حابارلايدى infohub.kz سايتى.
الماتى پوليسيا دەپارتامەنتى Instagram-داعى پاراقشاسىندا 2،5 كگ ەسىرتكى مەن جۇزدەگەن دايىن زاكلادكانىڭ تاركىلەنگەنىن حابارلادى. ارنايى وپەراسيا تۇركسىب اۋدانىندا جۇرگىزىلدى — پوليسيا مالىمەتىنشە، ەسىرتكى ساتۋ سحەماسىندا «قويما» ءرولىن اتقارۋى مۇمكىن ايەل ۇستالدى.
«جەكە ءتىنتۋ كەزىندە ودان ۇيالى تەلەفون تابىلدى. نەگىزگى تابىلعان زاتتار كولىكتە بولدى. پوليسەيلەر قۇرامىندا ەسىرتكى بار 50 ورامانى، سونداي-اق ۇنتاق ءتارىزدى زات سالىنعان بىرنەشە ءىرى قاپتامانى تاركىلەدى. تاركىلەنگەن زاتتاردىڭ جالپى ماسساسى 2،5 كگ قۇرادى. سونىمەن قاتار، زيپ-پاكەتتەر مەن يزولەنتا — ەسىرتكىنى وراۋعا جانە ودان ءارى ساتۋعا دايىنداۋعا قاجەتتىنىڭ ءبارى تابىلدى»، — دەدى پوليسيادا.
الماتى پد-دا ۇستالعان ايەلدىڭ بۇعان دەيىن جاساعان قويمالارىنىڭ ورىندارىن كورسەتكەنىن قوستى. ناتيجەسىندە جەدەل ۋاكىلدەر ەسىرتكى زاتى بار تاعى 150 ورامانى تاۋىپ، تاركىلەدى.
«الدىن الا مالىمەتتەر بويىنشا، ۇستالعان ايەل ەسىرتكىنىڭ زاڭسىز اينالىمىنا قاتىسقان. ونىڭ ءرولى ءىرى پارتيالاردى قابىلداۋ، ساقتاۋ، وراۋ جانە كەيىن كۋرەرلەرگە بەرۋ ءۇشىن "ماستەر-كلادتار" دايىنداۋ بولدى. تاركىلەنگەن زاتتار سوت ساراپتاماسىنا جىبەرىلدى»، — دەپ ناقتىلادى پوليسيادا.
وسى فاكتى بويىنشا قىلمىستىق ءىس قوزعالدى.