الماتىنىڭ مەدەۋ اۋدانىندا پوليسەيلەر پاترۋلدەن قاشىپ، قۋعىن بارىسىندا ىشىندە ەسىرتكى بار سومكەنى تاستاپ كەتكەن ەر ادامدى ۇستادى. ىشىندەگى زات، بولجام بويىنشا، ماريحۋانا. ۇستالعان ادامنىڭ ءوزى قارا نارىقتاعى قۇنىن شامامەن 500 ملن تەڭگە دەپ باعالاعان، دەپ حابارلايدى infohub.kz سايتى.
وقيعا كەرەي–جانىبەك حاندار كوشەسىندە بولعان. «بۋران-613» ەكيپاجىنىڭ پاترۋلدەرى جەكە سەكتوردا كۇدىكتى جاس جىگىتتى بايقاعان.
پوليسەيلەردى كورگەن ول كەنەت باعىتىن وزگەرتىپ، قاشۋعا تىرىسقان. جۇگىرىپ بارا جاتىپ كيىمىن شەشىپ تاستاي باستاعان، سونداي-اق سومكەسىنەن دە قۇتىلعان.
«پاترۋلدەر ونى قاشىرىپ جىبەرمەدى. ەر ادام قورشاۋعا الىنىپ، ۇستالدى»، — دەپ حابارلادى پوليسيادا.
لاقتىرىلعان سومكەدەن وزىنە ءتان ءيىسى بار وسىمدىك تەكتەس زاتتىڭ ءىرى پارتياسى تابىلدى. الدىن الا دەرەكتەر بويىنشا، بۇل ماريحۋانا بولۋى مۇمكىن. تاركىلەنگەن زاتتىڭ ناقتى قۇرامى مەن سالماعىن سوت-حيميالىق ساراپتاما انىقتايدى.
قۇقىق قورعاۋ ورگاندارىنىڭ مالىمەتىنشە، ۇستالعان ادام ەسىرتكىنى ودان ءارى تاراتۋعا ارنالعانىن الدىن الا مويىنداعان. ونىڭ قارا نارىقتاعى بولجامدى قۇنىن شامامەن 500 ملن تەڭگە دەپ باعالاعان.
وقيعا ورنىنا مەدەۋ اۋدانى پوليسيا باسقارماسىنىڭ قىزمەتكەرلەرى مەن تەرگەۋ-جەدەل توبى كەلدى. زات تاركىلەنىپ، ساراپتاماعا جىبەرىلدى. بولعان جايت بويىنشا سوتقا دەيىنگى تەرگەۋ باستالدى.