26 جاستاعى الەكساندر ارتۋكوۆ الماتىداعى №4 قالالىق كلينيكالىق اۋرۋحانانىڭ كۇيىك بولىمىندە ءبىر اي بويى ءومىر ءۇشىن كۇرەستەن كەيىن ۇيىنە ورالۋدا. گاز باللونى جارىلعاندا ول اۋىر تەرميالىق كۇيىك جانە باروتراۆما العان. بۇل تۋرالى infohub.kz سايتى حابارلايدى.
دارىگەرلەردىڭ ايتۋىنشا، ەر ادامنىڭ ءۇي اۋلاسىنداعى قورادا گاز باللونى جارىلعان. زارداپ شەككەن ادام اۋىر كۇيىكپەن اۋرۋحانانىڭ قابىلداۋ بولىمىنە جەتكىزىلگەن. «پاسيەنتكە باروتراۆما، دەنەسىنىڭ 89%ء-ىنىڭ تەرميالىق كۇيىگى، ونىڭ 15%ء-ى تەرەڭ كۇيىك، سونداي-اق سول قولىنىڭ اۋىر جاراقاتى — جۇمساق تىندەرىنىڭ كەڭ زاقىمدانۋى دياگنوزى قويىلدى. اۋرۋحاناعا تۇسكەن العاشقى مينۋتتاردا دارىگەرلەر قارقىندى شوكقا قارسى تەراپيانى باستادى»، — دەلىنگەن حابارلامادا.
سول كۇنى الەكساندرعا زاقىمدالعان قولدى قالپىنا كەلتىرۋ ءۇشىن شۇعىل وتا جاسالدى. كەلەسى اپتالاردا ەم كۇيىك بولىمىندە جالعاستى. دەنساۋلىق ساقتاۋ مينيسترلىگىنىڭ مالىمەتىنشە، پاسيەنت بىرنەشە حيرۋرگيالىق ەم كەزەڭىنەن ءوتتى، سونىڭ ىشىندە تەرى اۋىستىرۋ (اۋتودەرموپلاستيكا) جانە زاقىمدالعان اياق-قولعا رەكونسترۋكتيۆتىك وتالار. وسى ۋاقىت بويى دارىگەرلەر كۇن سايىن ومىرلىك ماڭىزدى ورگانداردىڭ جۇمىسىن، اسپاپتىق-زەرتحانالىق كورسەتكىشتەردى باقىلاپ، ناۋقاستىڭ جاعدايىنا قاراي ەمدى تۇزەتىپ وتىردى.
«پاسيەنت بىزگە وتە اۋىر جاعدايدا كەلدى. ءتورت تاۋلىك بويى رەانيماسيادا جاتتى، جاعدايى تۇراقتاعاننان كەيىن كۇيىك بولىمىنە اۋىستىرىلدى. مۇنداي اۋماقتاعى كۇيىك — ءارقاشان دارىگەرلەر ءۇشىن ەڭ كۇردەلى سىناقتاردىڭ ءبىرى. كلينيكانىڭ كوپسالالى كومانداسىنىڭ ۇيلەسىمدى جۇمىسىنىڭ ارقاسىندا ناۋقاستىڭ ءومىرىن ساقتاپ قالدىق»، — دەدى كۇيىك ءبولىمىنىڭ مەڭگەرۋشىسى ەلدوس المەنوۆ.
الەكساندر ارتۋكوۆ ەم كەزىندە كومەك پەن قولداۋ كورسەتكەن دارىگەرلەر مەن مەديسينا قىزمەتكەرلەرىنە العىس ءبىلدىردى. ونىڭ ايتۋىنشا، دارىگەر-كارديولوگتار، تەراپەۆتەر، تراۆماتولوگتاردىڭ ارقاسىندا ەم وتە جاقسى وتكەن. «بارلىق پروسەدۋرالار كاسىبي تۇردە جانە ءىس جۇزىندە اۋىرتپالىقسىز ۇيىمداستىرىلدى. ماعان تەك فيزيكالىق ەمەس، سونىمەن قاتار ەموسيونالدىق قولداۋ دا كورسەتتى، ويتكەنى مۇنداي جاراقاتتاردى جەڭۋ وتە قيىن. بارلىق مەديسينا قىزمەتكەرلەرىنە — سانيتارلارعا، مەدبيكەلەرگە، دارىگەرلەرگە، انەستەزيولوگتارعا ۇلكەن راحمەت ايتقىم كەلەدى. كاسىبيلىكتەرىڭىز ءۇشىن بارلىعىڭىزعا وتە ريزامىن»، — دەدى ناۋقاس. الدا الەكساندردى ۇزاق ۋاقىت رەابيليتاسيا كۇتىپ تۇر.