Алматыда алғаш рет ғылыми гранттар конкурсының қорытындысы шығарылды: 23 жоба жалпы құны 348 млн теңге көлемінде қолдауға ие болды. Үздік әзірлемелердің авторларына сертификаттар 11 қарашада Алматы әкімдігі жанындағы Ғылым және технологиялар жөніндегі кеңестің отырысында табысталды, деп хабарлайды infohub.kz сайты.
Қаланың жастар саясаты басқармасының нақтылауынша, конкурс ғылымды дамыту және инновацияларды енгізу жұмыстары аясында алғаш рет өткізілді. Қатысуға 229 өтінім түсіп, алдын ала іріктеуден кейін келесі кезеңге 191 жоба жіберілді. Авторлар бес апталық акселерациялық бағдарламадан өтіп, ұсыныстарын жетілдіріп, сараптама комиссиясына таныстырды. Нәтижесінде 23 әзірлеме қаржыландыру алды.
Жеңімпаздар қатарында сейсмикалық құбылыстарды ерте анықтау жүйесі, автокөлік пен өнеркәсіптік шығарындыларды тазарту технологиялары, ауа, су және топырақ сапасын цифрлық бақылау жобалары бар. Сонымен қатар ғалымдар су қоймаларын тазарту үшін арнайы глайдерлерді пайдалануды және 2-ЖЭО мен 3-ЖЭО-ның күл-қож қалдықтарын шағын сәулет нысандарын 3D-басып шығаруға қайта өңдеуді ұсынды.
Қаланы көгалдандыру үшін ұзақ әсер ететін экологиялық таза препараттар әзірленді. Тағы бір жоба аллергенді өсімдіктерді бақылау жүйесін, тозаңдану күнтізбесін және тұрғындарды ықтимал қауіптер туралы хабардар етуді қарастырады.
Көлік саласында айқасқан жерлердегі қозғалысты бейімдеп басқаруға арналған SmartFlow жүйесі қолдауға ие болды. Басқа әзірлемелер қатарында — бейнеаналитика арқылы жоғалған адамдарды іздеуге арналған FaceAlert Almaty, лифтілердің қауіпсіздігін бақылайтын цифрлық платформа, сондай-ақ денсаулық сақтау саласындағы жобалар бар.
Жеңімпаздарды қалалық мәслихат депутаттары, Қазақстан Республикасы Ұлттық ғылым академиясының өкілдері, ғылыми қауымдастық және жұртшылық қатысқан конкурстық комиссия анықтады. Іріктеу кезінде зерттеулердің жаңалығы, практикалық маңызы және оларды қала шаруашылығында қолдану мүмкіндігі ескерілді.
Ғылым және технологиялар жөніндегі кеңестің отырысында әзірлемелерді одан әрі енгізу мәселесі де қаралды. Пилоттық сынақ үшін алаңдар беру, бизнесті бірлесіп қаржыландыруға тарту және жеңімпаздар қатарына енбеген перспективалы зерттеулерді қолдау талқыланды.
Ғылыми әзірлемелерді қолдау Қазақстан президенті Қасым-Жомарт Тоқаевтың ғылымды дамыту және инновацияларды экономикаға енгізу жөніндегі тапсырмалары аясында жүзеге асырылуда.
Еске салайық, ғылыми қауымдастық, мемлекеттік органдар және сараптама ортасының өкілдерін біріктірген Ғылым және технологиялар жөніндегі кеңес 2024 жылы Алматы әкімдігі жанынан құрылған.