الماتىدا الەۋمەتتىك جەلىدە تاراعان بەينەجازبادان كەيىن پوليسيا قىزمەتكەرلەرى تەكسەرۋ جۇرگىزىپ جاتىر. كادرلاردا ايەل جۇرگىنشىمەن جانجالداسىپ، وعان ءوز ءيتىن لاقتىرعان، دەپ حابارلايدى infohub.kz سايتى.
«كريمينالنىي كازاحستان» Telegram-ارناسىنىڭ مالىمەتىنشە، الماتىداعى №52 اۆتوبۋستىڭ جولاۋشىلارى يتكە قاتىگەزدىك تانىتقان، بىلاپىت سويلەپ، «فاس» دەپ بۇيرىق بەرگەن ايەلدى بەينەگە ءتۇسىرىپ العان.
كەيىن، كۋاگەرلەردىڭ ايتۋىنشا، ول كوشەدە ءيتتى تۇنشىقتىرىپ، تەپكەن. جۇرگىنشىلەر جاعدايعا ارالاسۋعا تىرىسقان. سوندا ايەل جانۋاردى ولارعا قاراي لاقتىرا باستاعان. الايدا جۇرگىنشىلەر ءيتتى الىپ قالا العان.
«بىرنەشە جىگىت ءيتتى ايەلدەن تارتىپ الدى. ولار ونى تاماقتاندىرىپ، ۆەتەرينارعا اپاردى، ءقازىر جانۋارعا جاڭا ءۇي ىزدەپ ءجۇر»، — دەلىنگەن جاريالانىمدا.
الماتى پوليسيا دەپارتامەنتىنىڭ ءباسپاسوز قىزمەتى NUR.KZ تىلشىسىنە الەۋمەتتىك جەلىدە تاراعان بەينەجازبا بويىنشا اۋەزوۆ اۋدانىنىڭ پوليسەيلەرى تەكسەرۋ جۇرگىزىپ جاتقانىن مالىمدەدى.
«كادرلاردا قولىنداعى ءيتتى جۇرگىنشىمەن جانجال كەزىندە پايدالانعان ايەلدىڭ ارەكەتتەرى تىركەلگەن. وسىعان بايلانىستى وقيعاعا قاتىسۋشىلاردىڭ جەكە باسى مەن بولعان جاعدايدىڭ بارلىق ءمان-جايى، سونىڭ ىشىندە جانۋارعا قاتىستى ارەكەتتەر انىقتالىپ جاتىر»، — دەدى ۆەدومستۆودا.
تەكسەرۋ قورىتىندىسى بويىنشا ايەلدىڭ ارەكەتتەرىنە قاتاڭ قۇقىقتىق باعا بەرىلىپ، ءتيىستى پروسەستىك شەشىم قابىلدانادى، دەپ ۋادە ەتتى ءتارتىپ ساقشىلارى.
«جانۋارلارعا مۇنداي قارىم-قاتىناسقا جول بەرىلمەيدى. ءار ادام ولارعا ادامگەرشىلىكپەن جانە جاۋاپكەرشىلىكپەن قاراۋعا، ولارعا ازاپ نەمەسە زيان كەلتىرۋى مۇمكىن ارەكەتتەرگە جول بەرمەۋگە مىندەتتى»، — دەپ شاقىردى پوليسەيلەر.
نازار اۋدارىڭىز، بەينەجازبادا بىلاپىت سوزدەر بار!