جاقىندا قۇتىرۋعا قارسى ۆاكسينانىڭ جەتىسپەۋشىلىگى تۋرالى جاعدايدان كەيىن قالا تۇرعىندارى رەداكسياعا جاڭا ماسەلە تۋرالى حابارلادى. وقىرمانداردىڭ ايتۋىنشا، كەنە قادالعان سوڭ بالالار جەدەل جاردەم بولىمشەسىندە ولارعا قالادا كەنە ەنسەفاليتىنە قارسى يممۋنوگلوبۋلين جوق دەپ ايتقان. بۇل تۋرالى infohub.kz حابارلايدى.
وتباسىن ماناس كوشەسىندەگى جەدەل جاردەم بولىمشەسىندە قابىلدادى: كەنەنى الىپ تاستاپ، جارانى وڭدەدى. الايدا بەرىلگەن انىقتامادا «كەنە ەنسەفاليتىنە قارسى ۆاكسينا جوق» دەپ كورسەتىلگەن.
جۇگىنگەن ادامنىڭ ايتۋىنشا، 1312 قىزمەتىنە قوڭىراۋ شالعاندا وعان دا الماتىدا پرەپارات جوق ەكەنىن راستاعان.
پىكىر الۋ ءۇشىن رەداكسيا قازاقستانداعى دارى-دارمەكتەردى مەملەكەتتىك دەنساۋلىق ساقتاۋ مەكەمەلەرىنە ساتىپ الۋ، ساقتاۋ جانە تەگىن جەتكىزۋمەن اينالىساتىن ءبىرىڭعاي ديستريبيۋتورعا جۇگىندى.
«كەنە ەنسەفاليتىنە قارسى يممۋنوگلوبۋلينمەن قامتاماسىز ەتۋگە كەلەر بولساق، 2026 جىلعا الماتى قوعامدىق دەنساۋلىق ساقتاۋ باسقارماسى 13،97 ليتر پرەپاراتقا قاجەتتىلىك ءبىلدىردى. ديستريبيۋتور ناۋرىزدا-اق بارلىق كولەمدى ساتىپ الىپ، جونەلتىپ قويعان. تاپسىرىس بەرۋشى الدىنداعى كەلىسىمشارتتىق مىندەتتەمەلەر تولىق ورىندالدى»، — دەپ حابارلادى «سك-فارماسيادا».
كومپانيادا ماۋسىم ايىندا شۇعىل ءوتىنىم بويىنشا جەتىسۋ وبلىسىنان الماتىعا قوسىمشا ءبىر ليتر يممۋنوگلوبۋلين جونەلتىلگەنىن، الايدا بۇل كولەم تولىق جۇمسالعانىن قوستى.
سونداي-اق قوسىمشا پارتيالاردى ساتىپ الۋ ءالى مۇمكىن بولماعانىن ءتۇسىندىردى. «سك-فارماسيادا» اتاپ وتكەندەي، ءوندىرۋشى كوكتەمدە-اق قويمادا پرەپارات جوق ەكەنىن ەسكەرتكەن، سوندىقتان قولدانىستاعى كەلىسىمشارت بويىنشا ونى جەتكىزۋ مۇمكىن ەمەس.
قازىرگى تاڭدا ءبىرىڭعاي ديستريبيۋتوردىڭ مالىمدەۋىنشە، قوسىمشا جەتكىزۋ بويىنشا جۇمىس جۇرگىزىلۋدە. الدىن الا تاعى 14 ليتر يممۋنوگلوبۋلين اكەلۋ تۋرالى كەلىسىمگە قول جەتكىزىلگەن. رۇقسات قۇجاتتارىن رەسىمدەۋ كەشىكتىرىلمەي وتسە، پرەپاراتتى شىلدەنىڭ سوڭىنا دەيىن جەتكىزۋ جوسپارلانۋدا.