الماتىدا ۇستالعان كولىكتەردى ەۆاكۋاسيالاۋ مەن ساقتاۋعا ءبىرىڭعاي تاريف بەلگىلەۋ ۇسىنىلدى. ءتيىستى شەشىم جوباسى قالالىق ءماسليحات دەپۋتاتتارىنىڭ قاراۋىنا ەنگىزىلدى، دەپ حابارلايدى infohub.kz سايتى.
بۇل تەك اكىمشىلىك قۇقىق بۇزۋشىلىق تۋرالى كودەكستە كوزدەلگەن جاعدايلاردا ۇستالىپ، كوممۋنالدىق ارنايى تۇراقتارعا جەتكىزىلگەن كولىك قۇرالدارىنا قاتىستى.
«بۇل بارلىق ەۆاكۋاسيا جاعدايلارىنا قاتىستى ەمەس ەكەنىن ءتۇسىنۋ ماڭىزدى. ۇسىنىلىپ وتىرعان ءتارتىپ تەك كولىك قۇرالى اكىمشىلىك قۇقىق بۇزۋشىلىق تۋرالى زاڭناماعا سايكەس ۇستالىپ، ارنايى تۇراققا جەتكىزىلگەندە عانا قولدانىلادى»، — دەدى ەرجان ديحانبايەۆ.
ۇقساس ءتاسىل الماتىنىڭ جول قوزعالىسىن ۇيىمداستىرۋ قاعيدالارىندا بەكىتىلگەن، وندا ەۆاكۋاسيا دەپ اقبتك بويىنشا ۇستالعان كولىك قۇرالىن ارنايى الاڭعا نەمەسە تۇراققا ماجبۇرلەپ جىلجىتۋ تانىلادى.
«جوبادا كولىك قۇرالىنىڭ ساناتىنا قاراماستان ەۆاكۋاسيانىڭ ءبىرىڭعاي قۇنىن — 3 اەك بەلگىلەۋ ۇسىنىلادى. مۇنداي ءتاسىل ەسەپتەۋ ءتارتىبىن ءبىرىزدى جانە اۆتوكولىك يەلەرىنە تۇسىنىكتى ەتەدى. سونىمەن قاتار كولىكتى ۋاقىتشا ساقتاۋ ءۇشىن اۆتوكولىك يەسىنە قوسىمشا شىعىنداردان جالتارۋعا نەمەسە ولاردى ازايتۋعا مۇمكىندىك بەرەتىن جەكە ءتارتىپ كوزدەلگەن»، — دەلىنگەن حابارلامادا.
بۇعان دەيىن، 30 شىلدەدە الماتى قالاسىنىڭ ءماسليحاتى جول قوزعالىسى قاعيدالارىندا رەتتەلمەگەن بولىگىندە اكىمشىلىك قۇقىق بۇزۋشىلىقتار بويىنشا ۇستالعان كولىك قۇرالدارىن جەتكىزۋ جانە ساقتاۋ ءتارتىبىن ايقىندايتىن جول قوزعالىسىن ۇيىمداستىرۋ قاعيدالارىن بەكىتتى.
ەگەر يەسى كولىگىن ەۆاكۋاسيالانعان كۇنى ساعات 18:00-گە دەيىن ارنايى تۇراقتان الىپ كەتسە، ساقتاۋ ءۇشىن تولەم ەسەپتەلمەيدى. وسىلايشا، كولىك قۇرالىن ۋاقتىلى العان جاعدايدا اۆتوكولىك يەسى تەك ەۆاكۋاسيا ءۇشىن تولەيدى.
«ەگەر كولىك ساعات 18:00-دەن كەيىن ارنايى تۇراقتا قالسا، ساقتاۋ قۇنى كولىك قۇرالىنىڭ ساناتىنا بايلانىستى ەسەپتەلەدى. بۇل رەتتە جوبادا العاشقى تاۋلىك ءۇشىن كەيىنگى ساقتاۋ تاۋلىكتەرىمەن سالىستىرعاندا تومەندەتىلگەن مولشەرلەمە قاراستىرىلعان. ماسەلەن، جەڭىل كولىكتەر ءۇشىن العاشقى تاۋلىككە 2،5 اەك، ال ءاربىر كەلەسى تاۋلىككە 5 اەك مولشەرىندە تولەم بەلگىلەۋ ۇسىنىلادى. باسقا ساناتتاعى كولىك قۇرالدارى ءۇشىن دە تولەم مولشەرى ولاردىڭ ءتۇرى مەن سيپاتتامالارىنا قاراي سارالانعان»، — دەپ قوستى اكىمدىكتە.
جوبا زاڭنامادا كوزدەلگەن قاراۋ راسىمدەرىنەن ءوتىپ، قاجەتتى وڭ قورىتىندىلاردى العانى حابارلانادى.
بۇعان دەيىن الماتىنىڭ كوممۋنالدىق تۇراقتارى ءۇشىن كولىك جۇكتەمەسىن ەسكەرەتىن جاڭا تاريفتەۋ جۇيەسى ۇسىنىلعانىن جازعان بولاتىنبىز.