الماتىداعى كوممۋنالدىق قىزمەت قىزمەتكەرلەرىنىڭ ءشوپ ۇستىندە دەمالىپ جاتقانىن كورسەتەتىن ۆيدەو الەۋمەتتىك جەلىلەردە قىزۋ تالقىعا ءتۇستى. ۆيدەو اۆتورى ايەلدەردى جۇمىس ىستەمەيدى دەپ ايىپتادى، الايدا ولاردىڭ زاڭدى تۇسكى ۇزىلىستە بولعانى انىقتالدى، دەپ حابارلايدى infohub.kz سايتى.
وقيعا 22 تامىزدا ساعات 13:10 شاماسىندا مايلين كوشەسىندەگى اللەيادا بولعان. تۇركسىب اۋدانىنىڭ «الماتى تازالىق» مكك قىزمەتكەرلەرى 12:00-دەن 14:00-گە دەيىن سوزىلاتىن تۇسكى ءۇزىلىس كەزىندە دەمالعان. الماتى اكىمدىگىنىڭ تۇسىندىرۋىنشە، كاسىپورىننىڭ وندىرىستىك پەرسونالى تاۋلىك بويى ءۇش اۋىسىممەن جۇمىس ىستەيدى، ءار اۋىسىمعا ەكى ساعاتتىق ەكى ءۇزىلىس قاراستىرىلعان: كۇندىزگى (12:00-دەن 14:00-گە دەيىن) جانە تۇنگى (00:00-دەن 02:00-گە دەيىن).
ارانداتۋشىلىق تۇسىرىلىمگە بايلانىستى مكك قىزمەتكەرلەرى 23 تامىزدا تۇركسىب اۋدانىنىڭ پوليسيا باسقارماسىنا ارىزدانعان. ايەلدىڭ جەكە باسى انىقتالدى. ونىڭ ارەكەتتەرىنەن ۇساق بۇزاقىلىق بەلگىلەرى بايقالعان، وسىعان بايلانىستى ق ر اقبتك-نىڭ 434-بابىنىڭ 1-بولىگى بويىنشا حاتتاما جاسالعان. ماتەريالدار پروسەسسۋالدىق شەشىم قابىلداۋ ءۇشىن الماتى قالاسىنىڭ مامانداندىرىلعان اكىمشىلىك سوتىنا جىبەرىلدى.
سونىمەن قاتار، تەكسەرۋ بارىسىندا ايەلدىڭ ءيتىن تۇمىلدىرىقسىز سەرۋەندەتكەنى انىقتالدى. جانۋارلارعا جاۋاپكەرشىلىكپەن قاراۋ سالاسىنداعى زاڭناما تالاپتارىن بۇزعانى ءۇشىن ول ق ر اقبتك-نىڭ 407-2-بابىنىڭ 1-بولىگى بويىنشا اكىمشىلىك جاۋاپكەرشىلىككە تارتىلدى. وعان 10 اەك مولشەرىندە، ياعني 43 250 تەڭگە ايىپپۇل سالىندى.