الماتىدا توعىز ءقاۋىپتى كوشكىن ۋچاسكەسىن نىعايتۋ جۇمىستارى اياقتالدى، ال ساراپشىلار تاعى جەتى ءقاۋىپتى ايماقتى انىقتادى، دەپ حابارلايدى infohub.kz سايتى.
تۇرعىندار مەن ينفراقۇرىلىمعا ءقاۋىپ توندىرگەن توعىز بەتكەيدى نىعايتۋ جۇمىستارى تولىق اياقتالدى. ءقازىر نىسانداردا اۋماقتاردى اباتتاندىرۋ جۇمىستارى اياقتالۋدا. اكىمدىكتىڭ حابارلاۋىنشا، شارالار 2025 جىلدىڭ قازان ايىندا تابيعي سيپاتتاعى توتەنشە جاعدايدان كەيىن باستالعان. جۇرگىزىلگەن ينجەنەرلىك جۇمىستار كوشكىن ءقاۋپىن ەداۋىر تومەندەتۋگە مۇمكىندىك بەردى.
مەدەۋ اۋدانىندا بيىك تاۋداعى «مەدەۋ» مۇز ايدىنىنىڭ ماڭىنداعى بەتكەي، «شىمبۇلاق» تاۋ شاڭعى كۋرورتىنا اپاراتىن جول، «كەنساي-2» زيراتىنا اپاراتىن جول جانە بيىك تاۋداعى «مەدەۋ» سپورت كەشەنىنىڭ اۋماعىنداعى «سارىساي» بوگەتىنە اپاراتىن ەۆاكۋاسيالىق جول نىعايتىلدى. جەتىسۋ اۋدانىندا حوجامياروۆ كوشەسىندە، پاللادين كوشەسىنىڭ بويىندا جانە «كەمەل» زيراتىنىڭ اۋماعىندا ءۇش ۋچاسكەدە جۇمىستار جۇرگىزىلدى. ناۋرىزباي اۋدانىندا تاعى ەكى ۋچاسكە نىعايتىلدى – «مەدەۋ» تۇرعىن ءۇي كەشەنىندەگى ۋسيكوۆ كوشەسىندە جانە «اقجارتاۋ» باعباندىق سەرىكتەستىگىنە كىرەبەرىستەگى جولدا.
الەۋەتتى ءقاۋىپتى بەتكەيلەردى تەكسەرۋ جالعاسۋدا. جۇمىس توبىنا جۇمىلدىرۋ دايىندىعى، اۋماقتىق جانە ازاماتتىق قورعانىس باسقارماسىنىڭ، الماتى تجد، «قازسەلدەنقورعاۋ» مم، گەوگرافيا جانە سۋ قاۋىپسىزدىگى ينستيتۋتىنىڭ، سونداي-اق اۋدان اكىمدىكتەرىنىڭ ماماندارى كىردى. تەكسەرۋ قورىتىندىسى بويىنشا كوشكىن ءقاۋپى جوعارى تاعى جەتى ۋچاسكە انىقتالدى. ولار ءۇشىن جوبالىق شەشىمدەر ازىرلەنۋدە، ودان كەيىن نىعايتۋ جۇمىستارىن جۇرگىزۋ جوسپارلانۋدا.
سەل، كوشكىن جانە قار كوشكىنى ءقاۋپى بار ۋچاسكەلەردە توتەنشە جاعدايلاردىڭ الدىن الۋ ءۇشىن اقپاراتتىق-ەسكەرتۋ قالقاندارىن ورناتۋ جالعاسۋدا. تۇرعىندار مەن تۋريستەرگە SMS-حابارلامالار ارقىلى قولايسىز اۋا رايى تۋرالى حابارلانىپ وتىرادى. قاۋىپتىلىك ارتقان كەزەڭدەردە «شىمبۇلاق» اۋدانى مەن ۇلكەن الماتى كولىن قوسا العاندا، جەكەلەگەن تاۋ مارشرۋتتارىنا بارۋعا ۋاقىتشا شەكتەۋلەر ەنگىزىلەدى.