الماتىعا پراۆوسلاۆيە ءدىنىنىڭ قاسيەتتى جادىگەرى — تريميفۋنت اۋليەسى سپيريدوننىڭ شىرىمەيتىن وڭ قولى سالىنعان كوۆچەگ جەتكىزىلدى. جادىگەردى سالتاناتتى تۇردە قارسى الۋ ءراسىمى كەشە كەشكە ءوتتى، بۇل تۋرالى ميتروپوليت وكرۋگى حابارلادى، دەپ جازادى infohub.kz سايتى.
قاسيەتتى جادىگەر الماتىدا 6 قازاندى قوسا العاندا تۇرادى. وعان يۆەر-سەرافيم ايەلدەر موناستىرىندەگى سوفيا سوبورىندا تاعزىم ەتۋگە بولادى.
قازاقستاندا اۋليەنىڭ موششاسىنا 96 مىڭنان استام ادام تاعزىم ەتىپ ۇلگەردى، سوندىقتان الماتىدا دا سەنۋشىلەر كوپ بولادى دەپ كۇتىلۋدە.
جادىگەر قازاقستان بويىنشا وسىنداي اۋقىمدى ساپاردى العاش رەت جاساپ وتىر. ول ەلدىڭ التى قالاسىندا بولدى، الماتىدان كەيىن كوۆچەگ بايقوڭىرعا، پاۆلودارعا جانە شىمكەنتكە اتتانادى. موششانىڭ تۇراقتى ساقتالاتىن جەرى — گرەكيانىڭ كورفۋ ارالى.
تريميفۋنت اۋليەسى سپيريدون — III–IV عاسىرلاردا كيپردە ءومىر سۇرگەن، حريستيان الەمىندە ەڭ ءقادىرلى اۋليەلەردىڭ ءبىرى. پراۆوسلاۆيە الەمىندە ونى تاڭعالارلىق قاراپايىمدىلىعى، مەيىرىمدىلىگى جانە ومىرىندە دە، قايتىس بولعاننان كەيىن دە وعان جاسالعان دۇعالار ارقىلى بولاتىن سانسىز كەرەمەتتەرى ءۇشىن قاستەرلەيدى.
سپيريدون قاراپايىم مالشى بولعان، ال ەپيسكوپ بولعان سوڭ دا قاراپايىم ءومىر سالتىن جالعاستىردى. ول بارلىق تابىسىن كەدەيلەرگە تاراتىپ، قارىزداردى كەشىرىپ، اۋىر ناۋقاستاردى ەمدەدى.
تاريحي شەجىرەلەر ونىڭ دۇعالارى ارقىلى كيپردە قاتتى قۋاڭشىلىق كەزىندە جاڭبىر جاۋىپ، اشتىق توقتاعانىن، ال كەيدە تاسىعان وزەندەردىڭ شەگىنگەنىن سيپاتتايدى.
حريستيان داستۇرىندە اۋليە سپيريدونعا ەڭ كۇندەلىكتى، تۇرمىستىق قاجەتتىلىكتەردە دۇعا ەتۋ ادەتكە اينالعان. كوبىنەسە ودان تۇرعىن ءۇي ماسەلەلەرىن شەشۋدە — ءۇي ساتىپ الۋ، ساتۋ نەمەسە باسپانا تابۋدا؛ قارجىلىق قيىندىقتاردا جانە قارىزدان قۇتىلۋدا؛ جۇمىس ىزدەۋدە نەمەسە بيزنەستى ءساتتى جۇرگىزۋدە؛ اشتىق پەن كەدەيلىكتە كومەك سۇرايدى، ويتكەنى ول كەدەيلەردىڭ باستى قورعاۋشىسى سانالادى.