الماتىدا جاس جىگىت تاسپەن جۇمىس ىستەپ جاتقاندا كوزىنە اۋىر جاراقات الدى: جوعارى جىلدامدىقپەن ۇشقان سىنىق بىرنەشە قابىقتى تەسىپ، كوزدىڭ تەرەڭىنە كىرىپ كەتتى. وفتالمولوگتار كۇردەلى كوپ كەزەڭدى وتا جاساپ، بوگدە زاتتى الىپ شىقتى، دەپ حابارلايدى infohub.kz سايتى.
NUR.KZء-نىڭ مالىمەتىنشە، جاس جىگىت بالعامەن تاستى ۇساقتاپ جاتقاندا، سىنىقتىڭ ءبىرى كوزىنە تيگەن. بوگدە زات قاساڭ قابىقتى، كوز بۇرشاعىن، نۇرلى قابىقتى جانە كوزدىڭ تەرەڭ قۇرىلىمدارىن زاقىمداعان.
«وفتالمولوگتارعا كۇردەلى ءارى نازىك جۇمىس تۇردى: جاراقات وتە اۋىر بولدى — قاساڭ قابىق، كوز بۇرشاعى، نۇرلى قابىق جانە كوزدىڭ تەرەڭ قۇرىلىمدارى زاقىمدانعان»، — دەلىنگەن حابارلامادا.
دارىگەرلەر زاقىمدانعان قۇرىلىمداردى كەزەڭ-كەزەڭىمەن قالپىنا كەلتىرىپ، كوزدى جانە مۇمكىندىگىنشە كورۋ قابىلەتىن ساقتاپ قالۋعا تىرىستى.
«جاراقات وتە اۋىر بولدى: تاس سىنىعى كوزدىڭ تەرەڭىنە كىرىپ كەتتى. ءبىز كۇردەلى كوپ كەزەڭدى وتا جاسادىق: قاساڭ قابىقتى تىكتىك، جاراقاتتىق كاتاراكتانى الىپ تاستادىق، كوز بۇرشاعىن بەكىتتىك، نۇرلى قابىقتى پلاستيكالاپ، ۆيترەكتوميا جاسادىق. وتا بارىسىندا سىنىقتى تاۋىپ، الىپ تاستادىق، سودان كەيىن كوز قۇرىلىمىن ساقتاۋ ءۇشىن سيليكون مايىن ەنگىزدىك»، — دەدى وفتالمولوگيا بولىمشەسىنىڭ مەڭگەرۋشىسى گۇلزات ابدرايموۆا.
الماتى قالالىق قوعامدىق دەنساۋلىق ساقتاۋ باسقارماسى بۇل وقيعا تاسپەن جانە باسقا دا قاتتى ماتەريالدارمەن جۇمىس ىستەگەندە كوز جاراقاتى قانشالىقتى ءقاۋىپتى بولۋى مۇمكىن ەكەنىن تاعى ءبىر دالەلدەگەنىن اتاپ ءوتتى.
«مۇنداي جۇمىستار كەزىندە قورعانىش كوزىلدىرىك كيۋ قاجەت»، — دەپ قوستى باسقارمادا.