ءبىر جەتكىزىلىم الماتى پوليسەيلەرىنە «كۇلدىرەتىن گازدىڭ» ءىرى قويماسىن تابۋعا كومەكتەستى، دەپ حابارلايدى infohub.kz سايتى.
الماتى پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى ازوت زاكيسى بار باللوندى تاسىپ جۇرگەن كۇر'ەردى ۇستادى.
جەدەل-ىزدەستىرۋ ءىس-شارالارى بارىسىندا جەدەل ۋاكىلدەر جەتكىزۋ تىزبەگىن انىقتاپ، زاتتىڭ ءىرى پارتيالارى ساقتالعان قويماعا شىقتى.
«وتكىزىلگەن ءىس-شارالار ناتيجەسىندە زاڭسىز اينالىمنان ءارتۇرلى كولەمدەگى 685 باللون جانە ولاردى تولتىرۋعا ارنالعان جابدىق تاركىلەندى»، – دەدى دەپارتامەنتتەن.
وسى فاكتى بويىنشا قىلمىستىق ءىس قوزعالدى. پوليسەيلەر كۇشتى اسەر ەتەتىن زاتتىڭ زاڭسىز اينالىمىن ۇيىمداستىرۋعا قاتىسى بار بارلىق ادامداردى، سونداي-اق ونى جەتكىزۋ جانە وتكىزۋ ارنالارىن انىقتاۋدا.