الماتىدا جەتكىزۋ قىزمەتىنىڭ كۋرەرى ءتۇن ورتاسىندا كومەك سۇراعان ايقايدى ەستىپ، وقيعاعا ارالاسىپ، ايەلگە قاتىستى اۋىر قىلمىستىڭ الدىن الدى، دەپ حابارلايدى infohub.kz.
وقيعا وتكەن ءتۇنى ساعات 02:30 شاماسىندا مەدەۋ اۋدانىنداعى تۇرعىن ءۇي كەشەنىنىڭ بىرىندە بولعان. پوليسيا مالىمەتىنشە، كۋرەر تاپسىرىستى ورىنداپ، كىرەبەرىستەن شىعىپ بارا جاتقاندا، كۇزەت بولمەسىنەن ايەلدىڭ ايقايى ەستىلەدى. ول ەكى ويلانباستان وقيعاعا ارالاسىپ، ايەلگە قاتىستى زاڭسىز ارەكەتتى توقتاتقان، سودان كەيىن پاترۋلدىك ەكيپاجدى شاقىرتقان.
وقيعا ورنىنا كەلگەن پوليسەيلەر كۇدىكتىنى ۇستاپ، مەدەۋ اۋداندىق پوليسيا باسقارماسىنا جەتكىزگەن. «كۋاگەردىڭ ۋاقتىلى ارالاسۋىنىڭ ارقاسىندا قىلمىستىق نيەت سوڭىنا دەيىن جۇزەگە اسپادى. وسى فاكتى بويىنشا سوتقا دەيىنگى تەرگەۋ باستالدى. وقيعانىڭ ءمان-جايى انىقتالىپ جاتىر»، — دەلىنگەن پوليسيا حابارلاماسىندا.
پوليسيا ازاماتتاردىڭ بەي-جاي قاراماۋى اۋىر قىلمىستاردىڭ الدىن الۋعا ءجيى كومەكتەسەتىنىن اتاپ ءوتىپ، وسىنداي جاعدايلاردا دەرەۋ 102 تەلەفونىنا حابارلاسۋعا شاقىردى.
بۇعان دەيىن Kursiv LifeStyle قازاقستاندىق بلوگەر ارمان ءال-اميننىڭ قارجىلىق قيىندىقتار كەزىندە جۇزدەگەن مىڭ جازىلۋشىسى بولا تۇرا، جەتكىزۋ قىزمەتىندە كۋرەر بولىپ جۇمىس ىستەگەنىن مويىنداعانىن جازعان. ونىڭ «جامان جۇمىس جوق» دەگەن اڭگىمەسى الەۋمەتتىك جەلىلەردە كەڭ رەزونانس تۋدىرىپ، كوپتەگەن قولداۋ سوزدەرىن جيناعان.