الماتىدا جەڭىل رەلستى كولىك (LRT) 2027 جىلدىڭ سوڭىندا ىسكە قوسىلادى. بۇل تۋرالى قالالىق جول ينفراقۇرىلىمىن دامىتۋ باسقارماسى حابارلادى. ءقازىر دايىندىق جۇمىستارى جۇرگىزىلۋدە، دەپ حابارلايدى infohub.kz.
ماماندار ەسكى ترامۆاي رەلستەرى مەن اسفالت جابىنىن بۇزىپ ۇلگەردى. ودان كەيىن جاڭا قالالىق كولىك ءتۇرىنىڭ نەگىزىن سالۋ جوسپارلانۋدا.
LRTء-دىڭ ءبىرىنشى جەلىسى الاتاۋ اۋدانىنداعى يندۋستريالىق ايماقتى مەگاپوليستىڭ ورتالىق بولىگىمەن جانە الماتى-2 تەمىرجول ۆوكزالىمەن بايلانىستىرادى. مارشرۋتتىڭ ۇزىندىعى 18 شاقىرىمدى قۇرايدى. 34 ايالداما قاراستىرىلعان. ءبىر قۇرام 285 ادامعا دەيىن سىيدىرا الادى، ال ورتاشا جىلدامدىعى ساعاتىنا 35 شاقىرىمنان اسپايدى.
استانادان ايىرماشىلىعى، الماتىلىق جەڭىل رەلستى كولىك نەگىزىنەن جەر بەتىمەن جۇرەدى جانە كوپ مەترلىك ەستاكادالاردى سالۋسىز كوشەلەر بويىمەن وتەدى. ونىڭ ەرەكشەلىگى - اۋە ەلەكتر جەلىلەرىنىڭ بولماۋى.
«LRT قۇرىلىسى اياسىندا قوزعالمالى قۇرامدى اۋە ەلەكتر جەلىلەرىمەن جابدىقتاماۋدىڭ زاماناۋي شەشىمدەرى قاراستىرىلۋدا. اتاپ ايتقاندا، قوزعالمالى قۇرام ستانسيالاردا زاريادتالاتىن ءوز باتارەيالارىنىڭ ەسەبىنەن قوزعالادى. مۇنداي شەشىمدەر اۋە جەلىلەرىن بولدىرماۋ ءۇشىن، ياعني اسپان تازا بولۋى ءۇشىن قاراستىرىلۋدا»، — دەدى الماتى قالالىق جول ينفراقۇرىلىمىن دامىتۋ باسقارماسى باسشىسىنىڭ ورىنباسارى اسان بوستانوۆ.