الماتى قالالىق ءماسليحاتىنىڭ كەزەكتى سەسسياسىندا تولە بي كوشەسىندەگى جەڭىل رەلستى كولىك (LRT) قۇرىلىسىنىڭ ناقتى مەرزىمدەرى ايتىلدى، دەپ حابارلايدى infohub.kz سايتى.
جينالىس بارىسىندا ۇسىنىلعان اقپاراتقا سايكەس، تولە بي كوشەسىندەگى LRT جوباسى اياسىنداعى قۇرىلىس جۇمىستارىن قاراشا ايىنىڭ سوڭىنا دەيىن اياقتاۋ جوسپارلانىپ وتىر. ال ءبىرىنشى جەلىنىڭ ءبىرىنشى كەزەڭىن تولىعىمەن كەلەسى جىلدىڭ جەلتوقسانىندا ءبىتىرۋ كوزدەلگەن.
ءماسليحات سەسسياسىندا LRT قۇرىلىسىنىڭ قارقىنى تۋرالى ماسەلەنى دەپۋتات بەيبىت قۇسايىنوۆ كوتەردى. ونىڭ ايتۋىنشا، تۇرعىندار تولە بي كوشەسىنىڭ كەيبىر ۋچاسكەلەرى جابىلعانىن، الايدا قۇرىلىس جۇمىستارى بارلىق جەردە بىردەي جۇرگىزىلمەگەنىن ايتىپ شاعىمدانادى.
— الەۋمەتتىك جەلىلەردە تۇرعىندار تولە بي كوشەسىنىڭ جەكەلەگەن ۋچاسكەلەرىندە قۇرىلىس باستالعانىن، ءبىراق كەيبىر جابىق ۋچاسكەلەردە جۇمىسشىلار مەن تەحنيكانىڭ جەتكىلىكسىز ەكەنىن ايتىپ شاعىمدانىپ ءجۇر. جۇمىستار قاشان اياقتالىپ، بۇل ۋچاسكەلەر قانداي مەرزىمدە اشىلادى؟ — دەپ سۇرادى دەپۋتات.
ول سونداي-اق ۇزىندىعى شامامەن 18 شاقىرىم بولاتىن جوبانىڭ ءبىرىنشى كەزەڭىنىڭ اياقتالۋ مەرزىمىنە قىزىعۋشىلىق تانىتتى.
جول ينفراقۇرىلىمىن دامىتۋ باسقارماسىنىڭ باسشىسى ولجاس شابدانوۆ ۇزىندىعى 18،3 شاقىرىم بولاتىن LRT ءبىرىنشى جەلىسىنىڭ ءبىرىنشى كەزەڭىنىڭ قۇرىلىسى كەستەگە سايكەس جالعاسىپ جاتقانىن مالىمدەدى. ونىڭ ايتۋىنشا، ءقازىر نىساندا 80-گە جۋىق جۇمىسشى مەن 50-دەن استام قۇرىلىس تەحنيكاسى جۇمىلدىرىلعان.
قۇرىلىستىڭ نەگىزگى كەزەڭدەرىنىڭ ءبىرى — ينجەنەرلىك جەلىلەردى شىعارۋ. جوبا بويىنشا بارلىعى 282 ينجەنەرلىك كوممۋنيكاسيا قيىلىسىن قايتا جابدىقتاۋ قاراستىرىلعان. بۇگىنگى تاڭدا ونىڭ 90-ى بويىنشا جۇمىستار اياقتالدى.
— ينجەنەرلىك جەلىلەردى شىعارۋ جۇمىستارىن اعىمداعى جىلدىڭ قاراشا ايىنىڭ سوڭىنا دەيىن اياقتاۋدى جوسپارلاپ وتىرمىز. سونداي-اق مومىش ۇلى كوشەسىندە جولدىڭ جوعارعى قۇرىلىمىن سالۋعا كىرىستىك. بۇگىنگى تاڭدا 1600-گە جۋىق تەمىربەتون شپال مەن 600 پوگوندىق مەتر رەلس توسەلدى. تولە بيدەگى جۇمىستارعا كەلەتىن بولساق، ولاردى قاراشا ايىنىڭ سوڭىنا دەيىن اياقتاۋدى جوسپارلاپ وتىرمىز. جالپى جوبانى كەلەسى جىلدىڭ جەلتوقسانىندا ءبىتىرۋدى كوزدەپ وتىرمىز، — دەدى ولجاس شابدانوۆ.
سەسسيادا جەلىنى ودان ءارى دامىتۋ جوسپارلارى دا ايتىلدى. باسقارما باسشىسىنىڭ ايتۋىنشا، LRTء-نىڭ ەكىنشى كەزەڭى اياسىندا تولە بي كوشەسى بويىمەن «بارلىق» بازارىنا دەيىن ۇزارتۋ جوسپارلانۋدا.