الماتىدا مەدەۋبەكوۆا كوشەسىنىڭ اباي مەن رايىمبەك داڭعىلدارى ارالىعىنداعى بولىگىن قايتا جاڭعىرتۋ جوسپارلانىپ وتىر: ءجۇرىس بولىگى ءتورت جولاققا دەيىن كەڭەيتىلىپ، جاياۋ جۇرگىنشى جولدارى، ۆەلوجولدار جانە كوشە جارىعى پايدا بولادى، دەپ حابارلايدى infohub.kz سايتى.
جوبا تۋرالى قالالىق ءماسليحات وتىرىسىندا جول ينفراقۇرىلىمىن دامىتۋ باسقارماسىنىڭ باسشىسى ولجاس شابدانوۆ ايتىپ بەردى.
«مەدەۋبەكوۆا كوشەسىن اباي داڭعىلىنان رايىمبەك داڭعىلىنا دەيىنگى جالپى ۇزىندىعى 3،3 شاقىرىم ۋچاسكەدە قايتا جاڭعىرتۋ جوباسى ءجۇرىس بولىگىن ءتورت جولاققا دەيىن كەڭەيتۋدى كوزدەيدى. سونداي-اق جاياۋ جۇرگىنشى جولدارى مەن ۆەلوجولدار، كوشە سىرتقى جارىعى، سونداي-اق جول قوزعالىسىن ۇيىمداستىرۋدىڭ زاماناۋي قۇرالدارى قاراستىرىلعان»، — دەدى ولجاس شابدانوۆ.
ونىڭ ايتۋىنشا، قوعامدىق كولىككە ارنالعان بولەك جولاق مۇمكىندىگى كولىكتىك مودەلدەۋ بارىسىندا قارالادى.
«بۇل كوشەنى كەڭەيتۋ اباي داڭعىلىمەن جانە تولە بي مەن جۇبانوۆ كوشەلەرىنىڭ سالىنىپ جاتقان جالعاستارىمەن ماگيسترالدىك بايلانىس قۇرۋعا مۇمكىندىك بەرەدى. رىسقۇلوۆ داڭعىلىنا دەيىن ۇزارتۋ ازىرگە جوسپارلانباي وتىر»، — دەپ قوستى ول.
الماتى اكىمى دارحان ساتىبالدى بۇل ۋچاسكە بۇرىن وبلىس قاراماعىندا بولعانىن اتاپ ءوتتى.
«ءبىز جولدى قالاعا بەرۋدى سۇرادىق، ونى كەڭەيتۋ مەن كۇتىپ ۇستاۋدى ءوز بەتىمىزشە قارجىلاندىرامىز»، — دەدى ول.
ول اباي مەن رىسقۇلوۆ داڭعىلدارىنىڭ، تلەندييەۆ پەن سايىن كوشەلەرىنىڭ جالعاستارىندا دا وسىنداي جاعداي قالىپتاسقانىن قوستى.
«ءبىز شەكاراعا دەيىن جەتكىزىپ جاتىرمىز، شەكارادان ءارى جۇمىس جۇرگىزىلمەيدى. ءبىز دە بۇل ۋچاسكەلەردى وزىمىزگە الدىق، باقاد-قا دەيىن جەتكىزىپ، قالالىق بيۋدجەت ەسەبىنەن اياقتايمىز، ويتكەنى ولار ەڭ الدىمەن قالاعا قاجەت»، — دەپ تۇيىندەدى ول.