الماتىدا مەتروپوليتەن، جول جەلىسى جانە قوعامدىق كولىك دامىپ كەلەدى: 2026 جىلدىڭ سوڭىنا دەيىن قالا بيلىگى «قالقامان» اتتى جاڭا مەترو ستانسياسىن اشۋدى جوسپارلاپ وتىر، ال كەلەشەكتە «جىبەك جولى» ستانسياسىن اۋەجايمەن بايلانىستىرماق. بۇل تۋرالى infohub.kz سايتى حابارلايدى.
الماتى قالاسىنىڭ ەكونوميكا جانە قارجى باسقارماسىنىڭ باسشىسى باۋىرجان قۇدايبەرگەنوۆتىڭ تۇسىندىرۋىنشە، «قالقامان» ستانسياسى مەترونىڭ جاڭا تارماعىنىڭ بولىگى بولادى. بيىل «قالقاماننان» «بارلىق» ستانسياسىنا دەيىنگى ۋچاسكەنىڭ قۇرىلىسى باستالدى.
«مەترو جەلىسىن ودان ءارى كەڭەيتۋ ءۇشىن «جىبەك جولى» ستانسياسىنان اۋەجايعا دەيىنگى ەكىنشى جەلىنىڭ جوبالاۋ-سمەتالىق قۇجاتتاماسى ازىرلەنەدى»، — دەدى قۇدايبەرگەنوۆ ءماسليحات وتىرىسىندا.
جول قۇرىلىسى دا جالعاسادى. جوسپاردا رىسقۇلوۆ داڭعىلىن قالا شەكاراسىنا دەيىن ۇزارتۋ بار. سونداي-اق مۇقانوۆ كوشەسىن گوگولدەن رايىمبەك داڭعىلىنا دەيىن ۇزارتادى. رايىمبەك داڭعىلىن شىعىس اينالما اۆتوموبيل جولىنا (شااج) دەيىن ۇزارتۋ كوزدەلگەن.
جىل سوڭىنا دەيىن اقجار جانە تەرەكتى شاعىن اۋداندارىنداعى جولداردىڭ قۇرىلىسى اياقتالۋى ءتيىس. «باتىس قاقپا» پوليورتالىعىندا دا جاڭا جولدار مەن ينجەنەرلىك جەلىلەر پايدا بولادى.
«قوسىمشا قاراجات قوعامدىق كولىكتى — اۆتوبۋس تاسىمالى مەن مەتروپوليتەندى سۋبسيديالاۋعا دا قاراستىرىلعان»، — دەپ قورىتىندىلادى قالا اكىمدىگىندە.
بۇعان دەيىن «كۋرسيۆ» «الماتىمەتروكۇرىلىس» كومپانياسى 2025 جىلدىڭ قورىتىندىسى بويىنشا 866،9 ملن تەڭگە شىعىنعا ۇشىراعانىن جازعان. سونىمەن قاتار، ءتۇرلى سوت ىستەرى بويىنشا كومپانيا مەردىگەرلەرگە 500 ملن تەڭگەدەن استام قارىز، ال ولاردىڭ الدىنداعى جالپى قارىزى 2،3 ملرد تەڭگەدەن اسادى.