الماتى تۇرعىندارى نازاربايەۆ كوشەسى، 245 مەكەنجايىنداعى ءۇيدىڭ قاسبەتىن بەزەندىرىپ تۇرعان ايگىلى مۋرالدىڭ جوعالۋىنا نارازىلىق ءبىلدىردى. Threads الەۋمەتتىك جەلىسىندە الماتىلىقتار بۇل جوعالتۋدى بىرنەشە كۇن بويى تالقىلاپ جاتىر، دەپ حابارلايدى infohub.kz سايتى.
جاريالانىم اۆتورى: «تاعى ءبىر مۋرال جوعالدى. ال ءبىز ونى جاقىندا عانا قالپىنا كەلتىرگەن ەدىك...» دەپ جازدى. ونى باسقا پايدالانۋشىلار قولداپ، مۋرال فونىندا ءار جىلدارى تۇسىرىلگەن فوتوسۋرەتتەردى جاريالادى. پىكىرلەردە: «مەن ءتىپتى شىداي المايمىن، بۇل جۇمىس ءۇشىن قانشالىقتى وكىنەمىن. ەندى قالپىنا كەلتىرۋ مۇمكىن ەمەس پە؟»، «ادەمى جۇمىس ەدى عوي! مۇنداي شىعارمانى نەگە بويايدى؟»، «بۇل ەڭ ادەمىلەردىڭ ءبىرى ەدى» دەگەن پىكىرلەر ايتىلدى.
جاعدايعا بوستاندىق اۋدانىنىڭ اكىمدىگى تۇسىنىكتەمە بەردى. رەسمي جاۋاپتا اتالعان مەكەنجايدا كوپپاتەرلى تۇرعىن ۇيلەردىڭ قاسبەتتەرىن ساندىك-ارلەۋ جۇمىستارى جۇرگىزىلىپ جاتقانى حابارلاندى. جۇمىس باستالماس بۇرىن قاسبەتتىڭ تەحنيكالىق جاعدايىنا تەكسەرۋ جۇرگىزىلىپ، وندا سىلاق قاباتىنىڭ قابىرشاقتانۋى، جارىقتار، جەكەلەگەن بولىكتەردىڭ دوڭەيۋى، قاسبەت ارلەۋىنىڭ بۇزىلۋى جانە سىرتقى جابىننىڭ السىرەۋى سياقتى كوپتەگەن اقاۋلار انىقتالعان.
اكىمدىكتىڭ ءباسپاسوز قىزمەتى: «اتالعان اقاۋلار قاسبەت ەلەمەنتتەرىنىڭ قۇلاۋى سالدارىنان تۇرعىندار مەن جاياۋ جۇرگىنشىلەردىڭ قاۋىپسىزدىگىنە ىقتيمال ءقاۋىپ ءتوندىردى، سونداي-اق عيماراتتىڭ ساۋلەتتىك كەلبەتى مەن قالا ورتاسىنىڭ ەستەتيكالىق كورىنىسىنە تەرىس اسەر ەتتى»، — دەپ اتاپ ءوتتى. سونداي-اق، جۇمىس باستالماس بۇرىن ءۇي تۇرعىندارىمەن جينالىستار وتكىزىلىپ، ولاردىڭ جۇمىس جۇرگىزۋگە كەلىسىمىن بىلدىرەتىن جينالىس حاتتاماسى بار ەكەنى ايتىلدى.
وسىعان بايلانىستى انىقتالعان اقاۋلاردى جويۋ بويىنشا جوندەۋ جۇمىستارىن جۇرگىزۋ قاجەتتىلىگى تۋىندادى. پىكىرلەردە ءۇيدىڭ قاسبەتىنىڭ قازىرگى كورىنىسى دە كورسەتىلدى.