Almaty Museum of Arts العاش رەت امەريكاندىق سۋرەتشى كريستيان ماركلەيدىڭ «ساعات» (The Clock) اتتى 24 ساعاتتىق ۆيدەوينستاللياسياسىن ۇسىنادى. الماتى تۇرعىندارى مەن قوناقتارى 12 قىركۇيەك پەن 12 قازان ارالىعىندا زاماناۋي ونەردىڭ بۇل اتاقتى تۋىندىسىن تاماشالاۋعا بىرەگەي مۇمكىندىك الادى، دەپ حابارلايدى infohub.kz سايتى.
ۆيدەوينستاللياسيا ءال-فارابي اۋديتورياسىندا كورسەتىلەدى. «ساعات» كوركەم جانە دەرەكتى فيلمدەردىڭ مىڭداعان ۇزىندىلەرىنەن تۇرادى، ولاردا ساعاتتار كورىنەدى نەمەسە ۋاقىت تۋرالى ايتىلادى. بۇل — XXI عاسىرداعى زاماناۋي ونەردىڭ ماڭىزدى تۋىندىلارىنىڭ ءبىرى، ول بۇعان دەيىن ورتالىق ازيادا ەشقاشان كورسەتىلمەگەن.
كورمە بارىسىندا مۇراجاي 19 قىركۇيەك، 26 قىركۇيەك، 3 قازان جانە 10 قازان كۇندەرى تاۋلىك بويى اشىق بولادى. كەلۋشىلەر تاۋلىكتىڭ كەز كەلگەن ۋاقىتىندا كەلىپ، سول ساتتەگى ۋاقىتقا سايكەس كەلەتىن تۋىندىنىڭ ءبىر بولىگىن كورە الادى. الايدا بۇل كۇندەرى قالعان زالدار جابىق بولادى.
تاۋلىك بويى كورسەتىلىم كۇندەرىندە كىرۋ قۇنى كەلۋ ۋاقىتىنا بايلانىستى بولادى. ەگەر 21:00-دەن كەيىن كەلسەڭىز، «ساعاتتى» تاماشالاۋ بيلەتى نەبارى 500 تەڭگە تۇرادى. 21:00-گە دەيىن مۇراجايعا كادىمگى ەرەسەكتەر بيلەتى 3000 تەڭگە تۇرادى.
تۋىندىنىڭ باستى ەرەكشەلىگى — ناقتى ۋاقىتپەن سينحروندالۋى. مىسالى، كەلۋشى زالعا 12:53-تە كىرسە، ەكراندا دا ءدال سول ۋاقىت — 12:53 كورسەتىلەدى. بەينە ءدال 24 ساعاتقا سوزىلادى جانە تاۋلىكتى ۇزدىكسىز قايتالايدى.
كريستيان ماركلەي 1955 جىلى دۇنيەگە كەلگەن، لوندون مەن نيۋ-يوركتە تۇرىپ، جۇمىس ىستەيدى. ول دىبىسپەن، بەينەمەن جانە كوللاجبەن جۇمىس ىستەيتىن سۋرەتشى، كومپوزيتور ءارى مۋزىكانت رەتىندە تانىمال. «ساعات» تۋىندىسىن ول بىرنەشە جىل بويى دايىندادى. شىعارمانىڭ نەگىزىنە ۋاقىت تاقىرىبىن بىرىكتىرەتىن فيلمدەردىڭ مىڭنان استام ءۇزىندىسى ەندى.
ەسكە سالا كەتەيىك، 1 شىلدە مەن 17 قاڭتار ارالىعىندا «بيلل ۆيولا: ۋاقىت كەڭىستىگى» كورمەسى ءوتىپ جاتىر، ال 8 قىركۇيەكتەن باستاپ «مۇسىندەر: 1950 جىلداردان بۇگىنگە دەيىنگى قازاقستان ءمۇسىنى» كورمەسى اشىلادى.