Алматыдағы жасырын нарколаборатория туралы істе кассациялық сот Бас прокуратураның араласуынан кейін екі айыпталушыға қатысты жазаны қатаңдатты, деп хабарлайды infohub.kz сайты.
Қадағалау органының дерегінше, Алматының екі тұрғыны психотроптық заттардың аналогтарын жасайтын жасырын зертхана ұйымдастырған. Үй-жайда арнайы жабдық, таразы, қаптама және нұсқаулықтар болған, ал дайындалған заттың жалпы салмағы шамамен 3,9 кг болды. Қылмыс кейіннен сату мақсатында адамдар тобының алдын ала сөз байласуымен жасалған.
Екі қатысушы да кінәлі деп танылып, бас бостандығынан айырылды: біреуіне 8 жыл, екіншісіне 7 жыл 6 ай жаза тағайындалған.
«Жаза мөлшері 297-баптың жаңа редакциясының санкциясы бойынша айқындалған, онда жасау әрекеті көзделмеген, өйткені 2025 жылдың басында есірткі мен оның аналогтарын сату мақсатында жасау жеке 297-1-бапқа бөлінген. Сонымен қатар, егер жаңа заң сотталғанның жағдайын жақсартпаса және жазаны мәні бойынша өзгертпесе, ол қолданылмайды, адам қылмыс жасалған кезде қолданыста болған заң бойынша сотталады. Осыған байланысты жаза Қылмыстық кодекстің қылмыс жасалған сәтте қолданыста болған редакциясындағы 297-бабы бойынша тағайындалуға тиіс еді, ол психотроптық заттардың аналогтарын жасағаны үшін 10 жылдан 15 жылға дейінгі мерзімге бас бостандығынан айыру жазасын көздеген», — деп түсіндірді прокурорлар.
Осыған байланысты Бас прокуратураның наразылығы бойынша іс кассациялық тәртіппен қайта қаралды. Нәтижесінде кассациялық сот сот актілерін өзгертіп, жаза мерзімдерін ұлғайтты: біреуіне 10 жыл 6 айға бас бостандығынан айыру, екіншісіне 10 жыл жаза тағайындалды.