الماتى اكىمدىگى قالا تۇرعىندارىن ناۋرىزباي باتىر كوشەسىندەگى قوزعالىستىڭ جاڭا سۇلباسى تۋرالى ەسكەرتتى. ول 1 تامىزدان باستاپ كۇشىنە ەنەدى، دەپ حابارلايدى infohub.kz سايتى.
الماتى اكىمدىگىنىڭ ءباسپاسوز قىزمەتىنىڭ مالىمەتىنشە، مەگاپوليستە جول ءجۇرىسىن ۇيىمداستىرۋدى جەتىلدىرۋ جالعاسۋدا. 1 تامىزدان باستاپ ناۋرىزباي باتىر كوشەسىنىڭ رايىمبەك داڭعىلىنان اباي داڭعىلىنا دەيىنگى بولىگىندە جاڭا قوزعالىس سۇلباسى ەنگىزىلەدى. ول جەكە ۆەلوسيپەد ينفراقۇرىلىمىن قۇرۋدى كوزدەيدى.
«جۇرگىزىلەتىن جۇمىستار اياسىندا مارشرۋتتىق كولىك قۇرالدارىنا ارنالعان بولەك جولاق الىنىپ تاستالادى. اۆتوبۋس باعىتتارى جەلتوقسان كوشەسىنە اۋىستىرىلادى، بۇل ناۋرىزباي باتىر كوشەسىندە ۆەلوجول ۇيىمداستىرۋعا مۇمكىندىك بەرەدى»، — دەلىنگەن حابارلامادا.
وزگەرىستەر ۆەلوسيپەدشىلەردىڭ قاۋىپسىزدىگىن ارتتىرۋعا، قالالىق ۆەلوينفراقۇرىلىمدى دامىتۋعا جانە كولىك اعىندارىن ءتيىمدى بولۋگە باعىتتالعانى اتاپ ءوتىلدى.
جۇرگىزۋشىلەر مەن جول قوزعالىسىنىڭ باسقا دا قاتىسۋشىلارى الداعى وزگەرىستەردى الدىن الا ەسكەرىپ، مارشرۋتتاردى جاڭا سۇلباعا سايكەس جوسپارلاۋعا جانە جول بەلگىلەرى مەن سىزىقشالارىنىڭ تالاپتارىن ساقتاۋعا شاقىرىلادى.