الماتىدا اۋا رايى كۇرت ناشارلايتىندىقتان، كوممۋنالدىق جانە جەدەل قىزمەتتەر كۇشەيتىلگەن رەجيمگە كوشتى: 5 قازانعا قاراعان ءتۇنى مەگاپوليستە جەرگىلىكتى جەرلەردى سۋ باسۋى مۇمكىن قاتتى جاۋىن-شاشىن بولجانىپ وتىر، دەپ حابارلايدى infohub.kz سايتى.
قالا اكىمدىگىنىڭ ءباسپاسوز قىزمەتى مالىمدەگەندەي، جەدەل ارەكەت ەتۋ ءۇشىن ءموبيلدى بريگادالار، ارنايى تەحنيكا مەن موتوپومپالار الدىن الا دايىندالدى. «قازگيدرومەت» رمك دەرەگىنشە، 4 قازان كۇنى ساعات 21:00-دەن كەيىن ءالسىز جاڭبىر جاۋۋى مۇمكىن، الايدا ءتۇن ورتاسىنان كەيىن جاۋىن-شاشىننىڭ قارقىنى كۇشەيەدى — تۇندە كەيدە 15–20 مم-گە جەتەتىن قاتتى جاڭبىر جاۋادى. تاڭەرتەڭ جاۋىن-شاشىن السىرەپ، بولجام بويىنشا 5 قازان ساعات 12:00-گە دەيىن توقتايدى. سونىمەن قاتار سولتۇستىك-باتىس جەلدىڭ ەكپىنى 15–18 م/س-كە جەتەدى.
«ىقتيمال جەرگىلىكتى سۋ باسۋلاردىڭ الدىن الۋ جانە جەدەل جويۋ ءۇشىن 70 ءموبيلدى بريگادا كەزەكشىلىك ۇيىمداستىرادى. 337 ارنايى تەحنيكا، 103 موتوپومپا جانە 2،4 مىڭ قۇم سالىنعان قاپ دايىن تۇر. جۇمىسقا كوممۋنالدىق جانە جەدەل قىزمەتتەردىڭ 717 مامانى تارتىلدى»، — دەدى ۆەدومستۆودا.
نەگىزگى كۇش سۋ جينالاتىن ايماقتارعا شوعىرلاندىرىلادى. سۋ باسۋى مۇمكىن جەرلەردە اسسەنيزاتورلىق كولىكتەر كەزەكشىلىك ەتەدى، ال جول جۇمىسشىلارى موتوپومپالارمەن جانە قاجەتتى قۇرالدارمەن قامتاماسىز ەتىلگەن.
«جالپى كوممۋنالدىق قىزمەتتەردىڭ تاۋلىكتىك شىعىمى 3080 جول جۇمىسشىسى مەن 1225 ارنايى تەحنيكانى قۇرايدى. جۇمىستارعا „الماتى تازالىق“ مكك جانە جەكە مەردىگەر ۇيىمدار جۇمىلدىرىلدى»، — دەپ ناقتىلادى اكىمدىكتە.
بولجام بويىنشا، 6 قازاندا الماتىدا جاۋىن-شاشىنسىز، اينىمالى بۇلتتى اۋا رايى كۇتىلەدى.