الماتى وبلىسىنىڭ اگروونەركاسىپ كەشەنىنىڭ ەكسپورت كولەمى 2025 جىلدىڭ قورىتىندىسى بويىنشا 491 ملن دوللاردان استى، ال ءوڭىردىڭ اۋىل شارۋاشىلىعى تاۋارلارى مەن قايتا وڭدەلگەن ونىمدەرى الەمنىڭ 50-دەن استام ەلىنە جەتكىزىلۋدە. وڭىرلىك ەكسپورتتىڭ جالپى كولەمىنىڭ 60%-دان استامى اۋىل شارۋاشىلىعى ونىمدەرى مەن ولاردىڭ قايتا وڭدەلگەن تاۋارلارىنا تيەسىلى، دەپ حابارلايدى infohub.kz سايتى.
قازاقستان اۋىل شارۋاشىلىعى مينيسترلىگىنىڭ مالىمەتىنشە، الماتى وبلىسى ەلدىڭ ەكسپورتتىق باعىتتاعى اگرارلىق وڭىرلەرى اراسىندا كوشباسشى ورىنىن ساقتاپ وتىر. سىرتقى نارىقتاردا ءوڭىر كاسىپورىندارى وندىرگەن ەت، قۇس ەتى، جەمىس-جيدەك، كوكونىس، ءسۇت ونىمدەرى مەن سۋسىندار ەڭ جوعارى سۇرانىسقا يە.
ءىرى وندىرۋشىلەر ەكسپورتتىق الەۋەتتى دامىتۋعا ەلەۋلى ۇلەس قوسۋدا. ولار قىتايعا، ساۋد ارابياسىنا جانە تمد ەلدەرىنە بالمۇزداق، رەسەي نارىعىنا قىزاناق پەن سۋبليماسيالانعان ونىمدەر، سونداي-اق شەتەلدىك ءىرى ساۋدا جەلىلەرىنە شىرىندار، الكوگولسىز سۋسىندار جانە شاي ونىمدەرىن جەتكىزەدى.
«جالپى، الماتى وبلىسىنىڭ اگروونەركاسىپ كەشەنىنىڭ ءونىمى 50-دەن استام مەملەكەتكە ەكسپورتتالادى. ورتالىق ازيا جانە تمد ەلدەرىنەن باسقا، قازاقستاندىق وندىرۋشىلەر ءوز ونىمدەرىن گەرمانيا، پولشا، رۋمىنيا، بولگاريا، تۇركيا، بىرىككەن اراب امىرلىكتەرى، يران، يراك جانە پاكىستانعا جەتكىزەدى»، — دەدى ۆەدومستۆو وكىلدەرى.
ءوڭىردىڭ ماڭىزدى سىرتقى ساۋدا سەرىكتەستەرىنىڭ ءبىرى وزبەكستان بولىپ قالا بەرەدى. «سوڭعى ءۇش جىلدا وسى ەلگە ەكسپورت كولەمى ەكى ەسەگە جۋىق ءوستى — 110 ملن دوللاردان 203 ملن دوللارعا دەيىن. وزبەك نارىعىندا ۇن جانە ءسۇت ونىمدەرى ەڭ سۇرانىسقا يە تاۋارلار بولىپ وتىر»، — دەپ ءتۇسىندىردى ق ر اشم وكىلدەرى.
وڭىردە ەكسپورت كورسەتكىشتەرىنىڭ تۇراقتى ءوسۋى وندىرىستىك قۋاتتاردى كەشەندى جاڭعىرتۋ، ينۆەستيسيالار تارتۋ، زاماناۋي تەحنولوگيالاردى ەنگىزۋ جانە اگروونەركاسىپ كەشەنىن مەملەكەتتىك قولداۋ شارالارىن جۇزەگە اسىرۋدىڭ ارقاسىندا مۇمكىن بولعانى اتاپ وتىلەدى. اتقارىلىپ جاتقان جۇمىس جەتكىزۋ گەوگرافياسىن ودان ءارى كەڭەيتۋگە جانە قازاقستاندىق وندىرۋشىلەر ءونىمىنىڭ حالىقارالىق نارىقتارداعى پوزيسياسىن نىعايتۋعا، الماتى وبلىسىنىڭ ەكسپورتتىق الەۋەتىن دامىتۋ ءۇشىن جاڭا مۇمكىندىكتەر اشۋعا ىقپال ەتەدى.