الماتى وبلىسىندا وندىرىلگەن ءونىم الەمنىڭ 61 ەلىنە جەتكىزىلەدى. ءقازىر وڭىردەگى 49 كاسىپورىن ءوز ءونىمىن شەتەلگە ەكسپورتتايدى. سوڭعى ءۇش جىلدا جالپى ەكسپورت كولەمى 1،1 ملرد اقش دوللارىنا (شامامەن 515 ملرد تەڭگە) جەتتى. بۇل تۋرالى infohub.kz سايتى حابارلايدى.
كورشى مەملەكەتتەردەن باسقا، وبلىس كاسىپورىندارى تۇركيا، بىرىككەن اراب امىرلىكتەرى، يران، يراك، پاكىستان، گەرمانيا، پولشا، رۋمىنيا جانە بولگارياعا دا تاۋار جونەلتەدى. سوڭعى ءۇش جىلدا الىس شەتەلگە ەكسپورت كولەمى 2،1 ەسە ءوسىپ، 291،7 ملن دوللاردى قۇرادى.
نەگىزگى ساۋدا سەرىكتەسى — وزبەكستان. وعان ەكسپورت كولەمى ءۇش جىلدا 110 ملن دوللاردان 203 ملن دوللارعا دەيىن ءوستى. ەكسپورتتىڭ نەگىزگى تاۋارلارى — ۇن، ءسۇت ونىمدەرى جانە فارماسەۆتيكالىق بۇيىمدار.
وڭىرلىك ەكسپورتتىڭ 60%-دان استامى اۋىل شارۋاشىلىعى ونىمدەرى مەن ولاردىڭ قايتا وڭدەلگەن تاۋارلارىنا تيەسىلى. سونىمەن قاتار شەتەلگە قۇرىلىس ماتەريالدارى، حيميا ونەركاسىبى ونىمدەرى، فارماسەۆتيكا جانە تەمەكى بۇيىمدارى جونەلتىلەدى. ەڭ جوعارى سۇرانىسقا ەت، قۇس ەتى، جەمىس-جيدەك، كوكونىس، ءسۇت ونىمدەرى مەن سۋسىندار يە. الماتى وبلىسى كوكونىس شىرىندارىن ەكسپورتتاۋ بويىنشا قازاقستاندا ءبىرىنشى ورىندا.
الماتى وبلىسى كاسىپكەرلىك جانە يندۋستريالىق-يننوۆاسيالىق دامۋ باسقارماسىنىڭ باسشىسى ايبول راحىمباەۆتىڭ ايتۋىنشا، ءوڭىر بىرتىندەپ ەلدەگى ءىرى ەكسپورتتىق-لوگيستيكالىق ورتالىقتاردىڭ بىرىنە اينالۋدا. «بۇعان تاماق ونەركاسىبى، فارماسەۆتيكا جانە اۋىل شارۋاشىلىعى ونىمدەرىن قايتا وڭدەۋ كاسىپورىندارىنىڭ وندىرىستىك قۋاتىن ارتتىرۋ سەبەپ بولدى. ءوڭىردىڭ كولىكتىك-لوگيستيكالىق ينفراقۇرىلىمىنىڭ — قىتاي-ەۋروپا حالىقارالىق كولىك ءدالىزى، باكاد، زاماناۋي لوگيستيكالىق حابتار مەن قويما كەشەندەرىنىڭ دامۋى دا ماڭىزدى ءرول اتقارادى»، — دەدى راحىمبايەۆ.
Shin-Line كومپانياسى وتكەن جىلى جۇڭگو، ساۋد ارابياسى جانە تاۋەلسىز مەملەكەتتەر دوستاستىعى ەلدەرىنە رەكوردتىق 15 مىڭ توننا بالمۇزداق جەتكىزدى. Fruit Art جانە LST AGRO كاسىپورىندارىنىڭ قىزاناقتارى مەن سۋبليماسيالانعان ونىمدەرىنىڭ 90%-عا جۋىعى رەسەيدىڭ ءىرى ساۋدا جەلىلەرىنە جىبەرىلەدى. RG Brands Kazakhstan كومپانياسى شىرىن، الكوگولسىز سۋسىندار جانە شاي ونىمدەرىن جەتكىزۋدەن جىل سايىن شامامەن 60 ملن دوللار ەكسپورتتىق تابىس الادى.